Footer

Balo, pinatay armado a lallaki a riding in tandem

SAN JUAN, Ilocos Sur – Sabali pay a biag ti nagudas babaen ti ima dagiti kriminal a nagkalubbon iti motorsiklo iti pammapatay a naisayangkat iti Barangay Bacsil ditoy nga ili idi malem ti Nobiembre 12.

Awanen ti biag ni Severino Asuncion y Avecilla, 78, balo, mannalon, ken residente iti Barangay Guimod, ditoy met laeng nga ili, idi maidanon iti Magsingal District Hospital gapu iti sinagrapna a dunor iti makannigid a paset ti ulona.

Mapapati a sinursurot dagiti armado a suspek a nagkasakay iti nangisit a TMX ti topdown a Yamaha tricycle a minaneho ti biktima bayat ti panagdaliasatna iti provincial road a kumamang iti national highway.

Iti panagimbestiga dagiti polis, insardeng ni Asuncion ti traysikel iti sungaban ti national highway sakbay nga agballasiw ti luganna ket nagsardeng met ti motorsiklo dagiti suspek iti abay ti traysikel sa pinaltogan ti back rider ti biktima iti namitlo a daras  a nakatiruan ti makannigid a paset ti ulona.

Saan a naan-ano dagiti pasahero ni Asuncion a pakairamanan ti anakna a ni Madelyn Asuncion y Verida, 51, ken ti  apona a ni Joseph Carlo Andallo y Asuncion, 10.

Pinaturongan dagiti suspek dagiti tattao iti asideg ken binallaaganda a dida tumaliaw sada naglibas iti agpadaya a direksion.

Nakarekobre dagiti nagresponde a polis iti tallo a kapsula a nagtaud iti cal .45 iti nakapasamakan ti krimen.

Taktakuaten dagiti polis no ania ti motibo ti pammapatay.

Kabayatanna, di pay ammo ti kinaasino dagiti pimmaltog iti maysa a mannalon sadiay Sitio Alog, Barangay Dan-ar, Santiago, Ilocos Sur idi malem ti Nobiembre 15.

Kasta met a taktakuaten pay dagiti polis no ania ti motibo dagiti suspek a nanggandat iti biag ni Federico Gaoat Yecolin, 56, naasawaan, mannalon ken residente iti nadakamat a lugar.

Segun iti report manipud iti Santiago police, agpatpatang da Gaoat ken ni Barangay Kagawad Warlito Rigot iti barangay road idi nagsardeng ti maysa nga asul nga XRM motorcycle nga awanan plate number, dimsaag ti back rider, inasutna ti paltogna sana pinaputokan ti biktima iti naminsan.

Naglibas dagiti suspek iti agpadaya a direksion a nakasakay iti motorsikloda.

Nagpaarayat ni Rigor iti police station ket intaray dagiti polis ti biktima iti Candon City Hospital.

Maibasar iti x’ray examination, nabati ti slug iti tengnged ti biktima. Nupay kasta, naideklara ti biktima nga out of danger.#