Footer

Nagretiro nga opisial ti DepEd, posthumous awardee iti Quirino Day

VIGAN CITY – Maysa a nagretiro nga opisial ti Department of Education ti napili a pakaiyawatan ti posthumous award iti pannakaselebrar ti panagkasangay ni nag-Presidente Elpidio Quirino idi Nobiembre 16 ditoy.

Naited ti Pres. Elpidio Quirino Distinguish Medal of Public Service posthumous award ken daydi DepEd Assistant Schools Division Superintendent Natividad P. Buenavista iti simple a programa a naangay iti sanguanan ti monumento daydi Apo Pidiong iti dayaen ti provincial capitol.

Ti kabsatna, ni retired RTC Judge Arturo Buenavista, ti nangawat iti pammadayaw.

Nabigbig daydi nagawan a nagisuro iti Vigan Central School, nagbalin a prinsipal, district supervisor, division supervisor, sa assistant schools division superintendent  gapu iti nagapuananna iti tay-ak ti edukasion a pakairamanan ti panangputarna iti lyrics ti Ilocos Sur Hymn a makankanta bayat ti flag ceremony ken no adda pasken ken programa ditoy probinsia.

Daydi DepEd Music Supervisor Anselmo Pelayre ti kompositor iti Ilocos Sur Hymn.#

Comments are closed.