Footer

7,353 illegal lumber, kinumpiska dagiti polis iti paraangan ti barangay captain

SAN FERNANDO CITY – Nasurok a 7,300 board feet ti naputedputed nga illegal lumber a napempen iti paraangan ti kapitan ti Barangay Cabangtalan ditoy nga ili ti kinumpiska dagiti nagtitipon a police elements idi malem ti Nobiembre 23.

Iti report a dimmanon iti Police Regional Office iti San Fernando City, agdagup iti 7,353 a board feet ti naputedputed a molave, mahogany ken Gmelina (paper tree) ti kinumpiska dagiti nagtitipon nga elemento ti Sinait Police Station nga indauluan ni Chief of Police Senior Inspector Arsenio T. Ramos; Regional Public Safety Battalion – I (RPSB -I) nga indauluan ni Police Inspector Edgar R. Escreza, R2, S2  ISPPO, RIUI ken ISPPSC iti paraangan ni Cabangtalan Barangay Captain Arnulfo Iniba y Hernando, 45, naasawaan.

Kinuna ni Ramos a kinumpiskada dagiti nasao a lumber gapu ta awan ti naipakita ni Iniba a pammalubos iti pannakapukan dagitoy.

Rinukod ken inimbentario dagiti empleado ti Community Environment and Natural Resources Office, Vigan City dagiti nakumpiska a tablon iti imatang a mismo ni Mayor Amador Macugay

Agdagup amin iti 166 a pedaso dagiti nakumpiska a tablon a pakaibilangan ti 106 pedaso a mahogany (4,570.46 bd. ft.) nga agbalor iti P228,523.28; 30 pedaso a molave (1,021.84 bd. ft,) nga agbalor iti P112,402.04; ken 30 pedaso a gmelina (1,762.99 bd. ft,) nga agbalor iti P88,149.60. wenno iti kadagupan a P429,274.00.

Inimatangan a mismo da Rev. Fr. Jury Blanco ti Iglesia Filipino Independiente, barangay officials ti Cabangtalan ken sumagmamano a kameng ti media ti pannakaikarga dagiti nakumpiska a lumber iti dua nga Isuzu Forward truck ken maysa nga Isuzu Elf tapno maibiaheda babaen ti panangbayabay ti polis Sinait iti confiscation depot ti CENRO iti Barangay Capangpangan, Vigan City.

Kabayatanna, maisagsaganan ti kaso a panaglabsing iti PD 705 maikontra ken ni Iniba.#

Comments are closed.