Footer

Pammaltog, nagramut iti basura

SAN VICENTE, Ilocos Sur – Nagramut iti basura ti pammaltog a nagresulta iti pannakatay ti maysa sadiay Barangay Bayubay, ditoy nga ili idi rabii ti Nobiembre 25.

Pinaltogan ni Nestor Catacutan y Pichay, 44, naasawaan, drayber, ken residente iti Barangay Bayubay ni Mario Reprima y Rosuman, 62, naasawaan, retirado nga empleado ti ISECO, kalugaran met laeng ti suspek, gapu iti riri mainaig iti basura.

Iti panagimbestiga dagiti polis, idi agarup alas 7:00 ti sardam ti nadakamat a petsa, mapapati a kinompronta ni Reprima ti asawa ti suspek a ni Marilou, gapu iti panagbasura daytoy iti abay ti alad ti biktima ngem saan nga intaltalek ti babai.

Idi agarup 9:15 ti met laeng nadakamat a petsa, napan ni Reprima iti sango ti balay ni Catacutan ket mapapati a kinarit ti suspek ken  nagbassawang.

Nagsubli ni Reprima iti balayda ket bayat iti kaaddana iti paraanganda, mapapati a nagpaputok.

Mapapati met a nagpuesto ni Catacutan iti alad nga asideg iti balay ni Reprima sana pinaltogan ti biktima iti sumagmamano a daras a nakatiruan ti nadumaduma a paset ti bagi ti biktima.

Intaray dagiti nagresponde a polis ni Reprima iti Metro Vigan Cooperative Hospital, Bantay ngem pimmusay daytoy idi agarup 12:05 ti agsapa ti Nobiembre 26.

Inaresto dagiti polis ni Catacutan agraman ti cal 22 rifle Remington a naaramat iti pammaltog.

Nakasarak pay dagiti polis iti kapsula a naggapu iti cal 9mm a mapapati nga impaputok ti biktima.

Naipaiman ti kaso a murder maikontra ken ni Catacutan iti opisina ti provincial prosecutor.#