Footer

Wanted person, naaresto

STA. MARIA, Ilocos Sur – Inaresto ti nagtipon nga elemento ti Caoayan police station ken daytoy nga ili ti maysa a babai a sumangsango iti kaso  a panaglabsing iti Anti-Bouncing Check Law  a naireport nga aglemlemmeng iti Sitio Nalasin, Barangay Langawan ditoy nga ili idi aldaw ti Nobiembre 24.

Mapapati a pinadas ti akusado a nainaganan Grace Atinaja y Raquepo, 30, balasang, ken residente iti Barangay Naguilian, Caoayan, Ilocos Sur ti naglibas ngem kinamat dagiti polis agingga iti naipiskotda.

Insuko ti suspek ti maysa a cal 9mm Tanfoglio Armscor idi maaresto.

Imet dagiti polis idi mapanda arestaren ni Atinaja ti warrant of arrest nga inyisio ni Judge Edward D. Pacis ti Metropolitan Trial Court of Metro Manila, Branch 33, Quezon City gapu iti panaglabsing daytoy iti BP 22 a nai-docket iti babaen ti Criminal Case No. 160586 nga addaan iti P39,000.00 a piansa.

Naipaima ni Atinaja,  agraman ti kotsena a Mitsubishi Mirage color white nga addaan iti agsusupadi a dokumento iti Caoayan police para iti maikanatad a disposision.#

Comments are closed.