Footer

Baro, binagsol ti nabartek

SAN JUAN, Ilocos Sur – Dika agsaludsod iti nabartek ta dinto sabali ti pagawatanna. Leksion daytoy ti maysa a baro a binagsol ti maysa a nabartek gapu ta mapapati a dina nagustuan ti panagsaludsod ti biktima.

Segun iti inbestigasion, idi aggawid a nakasakay iti motorsiklo a Honda TMX da Roldan Valle y Allariao, 34, residente iti Barangay Sunggiam; Joel Ragasa y Vivit, 31, baro, ken Donato Villon, 78, naasawaan, agpada a residente iti Barangay Lapting, adda inikkatda a kawayan a naibangen iti dalan.

Dinamag ni Valle ken ni Mark Kevin Arellano y Villaspir, 18, baro; Jon Alvin Balanza y Arellano, 22, baro; ken Louie Bryan Balanza y Arellano, 25, agpapada a residente iti Barangay Cabanglutan, no isuda ti nangibalangan iti kawayan ket nagtungpal daytoy iti panagsubang dagiti dua ken panangbagsol ti suspek iti biktima iti sumagmamano a daras a nagsagrapan daytoy iti sugat iti tianna.

Mapapati a pinaturongan met dagiti agkabsat a Balanza da Villon ken Ragasa iti paltog isu a nagtaray dagitoy.

Nangisayangkat dagiti polis iti hot pursuit kadagiti suspek agingga iti natiliw dagiti suspek.

Adda itan dagiti suspek iti kustodia dagiti polis.#

Comments are closed.