Footer

Proyekto ti biogas dagiti Benedictine nuns, napadayawan

QUEZON CITY — Napili ti maysa a proyekto ti biogas ti Department of Energy ken Benedictine nuns iti Vigan City, Ilocos Sur ti maikadua a gunggona iti Freedom Project 2012 nga insayangkat ti Friedrich Naumann Foundation for Freedom’s Philippine Office iti seremonia a naangay iti H20 Hotel, Manila idi Disiembre 4.

Inrusat ti DOE babaen ti impasdekna nga Affiliated Renewable Energy Center (AREC) iti Mariano Marcos State University (MMSU), Batac, Ilocos Norte ti Biogas for Cooking and Power Generation iti Immaculate Heart of Mary Abbey, Vigan City, ket naipasdek iti lakub ti 5-ektaria a monasterio dagiti mamadre ti maysa a biogas digester nga addaan iti 232 cubic meters a kapasidad nga agar-aramat kadagiti material nga aggapu iti taraken dagiti mamadre a manok ken baboy.

Us-usarenen dagiti mamadre ti mapataud a gas manipud iti proyekto iti panaglutoda ken para iti silaw ti monasterio ken koriente a mangpataray kadagiti alikamenda kas iti freezer, water dispenser, bentilador, ken mangsilaw kadagiti piggery.

Nagpaay a hues da dati nga Isabela Governor ken agdama a Comelec Commissioner Grace Padaca, chairman, ken da  Dr. Julio Teehankee, Associate Professor at De La Salle University (DLSU), ken Lito Arlegue, Executive Director of the Council of Asian Liberals and Democrats (CALD), kas miembro.#

Comments are closed.