Footer

2 babai, natiliw iti akto a panagtakawda

STO. DOMINGO, Ilocos Sur – Dua a babai ti natiliw bayat iti akto a takawenda ti kuentas ti maysa a balo iti sanguanan ti comfort room iti tiendaan publiko ditoy nga ili idi aldaw ti Disiembre 17.

Akto a natiliw da Marjorie Tinaza y Baclig, 39, naasawaan, ken residente iti Barangay Pug-os, Cabugao ken ni Susan Casin y Ines, 42, balo, ken residente iti Barangay Pug-os, Sinait a mangtakaw iti 14k a kuentas ni Leonora Torrano y dela Cruz, 70, naasawaan, ken residente iti Barangay Poblacion ditoy nga ili bayat ti kaadda daytoy iti sango ti CR ti public market.

Nadlaw ti baket ti gandat dagiti dua ket nagpaarayat a nagtungpal iti pannakatiliw dagiti suspek.

Iti pannakaisurat daytoy, naidatag ti kaso a panagtakaw maikontra kadagiti dua iti opisina ti provincial prosecutor, Vigan City para iti preliminario nga inbestigasion.#

Comments are closed.