Footer

2 natay iti nagsina nga aksidente iti lugan

BANTAY, Ilocos Sur – Dua ti natay iti nagsina nga aksidente a napasamak iti national highway sadiay Bulag West, Bantay ken Barangay Gabur, Sta. Cruz idi Disiembre 14 ken 15, 2012.

Naireport a dead on the spot iti aksidente sadiay Bantay ni Sonny Boy Pescador y Pinto, 35, naasawaan, idinto a pimmusay iti ospital ni Loreto Garringo y Echala, 42, naasawaan, ken residente iti Barangay Patac, Galimuyod, Ilocos Sur gapu iti pannakainbolbarna iti aksidente sadiay Sta. Cruz, Ilocos Sur.

Segun iti inisial nga inbestigasion iti napasamak nga aksidente iti Bantay, Ilocos Sur, agpalaud a direksion ti Isuzu Elf a minaneho ni Mario Ramos y Vergara, 47, naasawaan, ken residente iti San Gabriel 1st, Bayambang, Pangasinan idi mapapati a kimmaut iti liniana ti agpadaya a motorsiklo a Motorstar a minaneho ni Pescador a nagtungpal iti panagdinnungparda.

Nupay mapapati a natay a dagus ni Pescador, naitaray iti Metro Vigan Cooperative Hospital, Bantay, agraman ti kinaluganna a maysa a Jonathan Piga y Cabanilla, 29, baro ken residente iti Sitio Riverside Brgy. An-annam, Bantay, Ilocos Sur  babaen dagiti nagresponde a polis.

Saan a naan-ano ti drayber ti Isuzu Elf ken ti kaduana a ni Junmat Taghoy y Jauquilia, 25, baro, ken residente iti Don Fabian Commonwealth, Quezon City.

Naipilan ti rekord ti kaso a reckless imprudence resulting in homicide, serious physical injuries and damage to property maikontra ken ni Ramos iti provincial prosecutor, Vigan City.

Nagpiansa ni Ramos iti P30,000.00 para iti temporario a pannakawayawayana.

Iti aksidente iti Barangay Gabur Sur, Sta. Cruz, mapapati a dinungpar ken tinarayan ti di nabigbig a lugan da Loreto Garringo y Echala ken ni Carlo Garringo y Echala a nagkalugan iti Honda TMX a motorsiklo.

Nadatngan dagiti nagresponde a polis dagiti dua a naidasay iti abay ti luganda ket immuna a naitaray dagitoy iti Tagudin General Hospital sa naiyalisda iti Ilocos Training Medical Center, San Fernando City, La Union gapu ta grabe dagiti dunorda.

Pimmusay ni Loreto iti nasao nga ospital iti sumuno nga aldaw.

Mapapati nga adda iti babaen ti inpluensia ti arak dagiti dua idi mainbolbarda iti aksidente ti lugan.

Iti pannakaisurat daytoy, di pay ammo ti kinasiasino ti nangdungpar kadagiti biktima.#

 

Comments are closed.