Footer

Nabati a plastic wallet, nagkarga iti droga

VIGAN CITY – Nabisto ti maysa a lalaki nga agik-ikut iti maiparparit a droga idi nabatina ti plastik a wallet iti napananna a pawnshop ditoy siudad idi malem ti Disiembre 23.

Nagpulong iti polis ti guardia ti Cebuana M. Lhuiller Pawnshop a masarakan iti General Luna St., nagsulian ti Del Pilar St., Barangay III, nga adda karga a white crystalline substance a mapapati a shabu ti plastik a wallet a nabati ti maysa a kustomer ti pagpapaayanna a pagsaldaan.

Sinukimat dagiti nagresponde a polis ti nasao a wallet ket positibo nga adda maysa a heat-sealed plastic sachet a karga ti nasao a wallet, malaksid laeng ti lima a papel de bangko a tig-P500.00.

Segun iti report, maysa a Roy Rayco Racragio, 45, naasawaan, natibo ti Ilaor Norte, Oas, Albay ngem agdama nga agindeg iti Solid West, ditoy siudad, ti simrek iti pawnshop idi agarup 1:39 ti malem ti nadakamat a petsa ta adda naipatulod kenkuana a kuarta ngem agsipud ta awan ti maipakitana nga identification card, imballakad ti maysa a personnel ti pawnshop a mangala iti pakabigbigan ken ni Rayco.

Iti ipapanaw ni Rayco iti pawnshop, nalipatanna dagiti gamitna a pakairamanan ti maysa a bassit a notebook, maysa a plastic wallet ken maysa a plastic transparent filester.

Idi saan a nagsubli ni Rayco, sinukimat ti guardia dagiti nabati daytoy iti pawnshop ket ditoy a naduktalanna nga adda karga ti plastic wallet a white crystalline substance a mapapati a shabu, isu nga inreportna daytoy iti polis.

Maysa a babai nga agnagan iti Sharon ti napan iti pawnshop tapno alaenna dagiti nabati ni Rayco ngem saan nga inted dagiti polis.

Madamdama, mismo a ni Rayco ti napan iti pawnshop ket kalpasan a positibo nga intudo ti guardia nga isu ti nangibati iti plastic wallet, inaresto dagiti polis.

Kalpasan ti pannakadokumento ken pannakamarka dagiti kukua ti suspek, naipan daytoy iti police station para iti maikanatad a disposision.

Nagkitakit ti suspek a maibabaen iti mediko legal nga eksamen.

Iti pannakaisurat daytoy, maisagsaganan ti kaso a panaglabsing iti RA 9165 maikontra ken ni Rayco.#

 

 

Comments are closed.