Footer

Naulit ni Sendong ken ni Pablo

Komentario ni Danilo Antalan

 

Iti maysa a pagilian a dinurudor ti maysa a trahedia, kasapulan la unay ti pammatibker tapno lumag-an ti marikrikna.

Paskua pay met ngarud.

Nagsangit ti pagilian gapu iti naames ken nakaal-alinggaget a pinamay-an ni Pablo kadagiti probinsia iti Visayas ken Mindanao, gapu iti mangliwengliweng nga angin, nakaal-alinggaget a layus ken batibat a landslides.

Nagsangit pay ti pagilian gapu iti panakaabak ni Manny Pacman Pacquaio iti boksing.

Ngem ngata, paset amin dagitoy iti pannubok ti tawen 2012 tapno iti kasta, ad-adda a tumibker ken tumakder a natibker ni Pinoy.  Am-ammo met ti Filipino nga iti aniaman a pannubok ken didigra a mangdalupo kaniana, ammona ti tumakder, dina ay-ayen ti bagina, ken kalpasan laeng iti mano nga aldaw, nakaisemto manen, a kasla awan didigra ken karit a nangbitog kaniana.

Narungsot unay ni Pablo—ti bagyo—ta nupay adayo pay laeng ket nakitan.  Mabukbukel pay laeng iti taaw ket sagsaganaanen.  Ngem idi immay ti ayonan, dimmalapus a kasla awan ti mabalin a makalapped kaniana.  Atiddog unay ti ramayna a nanggaw-at kadagiti kayatna a kammeten.  Aldaw wenno rabii, awan pilpilienna.  Awan panunotna isu ngata a dina mautob ti perwisio nga ibati.

Kalpasan ti sumagmamano nga oras, dimpaas dagiti nalalayog a niog, saba ken niog.  Napunas dagiti balay, pasdek ken inprastraktura.  Nagipulang iti biag dagiti ubbing, nanang, tatang ken babbaket ken lallakay a kaadduan iti naggapu iti Compostela Valley.

Iti pakabuklan, nasurok sangaribu (1,000) ti natay gapu ken ni bagyo Pablo; nasurok dua ribu (2,000) ti nasugatan, ken agarup walo gasut (800) ti mapukpukaw.   Nasurok 5 a million ti naapektaran a tao wenno 500,000 a pamilia, 1999 a barangay, 263 nga ili, 38 a siudad ken 32 a probinsia ti nagsagaba.

Nasurok P5 a billion ti nadadael iti inprastraktura, agarup P10 a billion ti nadadael iti agrikultura, P50 million a sanikua iti pribado a sektor, ken 88,000 a balay ti nadadael.

Saanen a naibilang ti mano a litro a lua a nagarubos iti mata dagiti naulila a nanang, tatang ken anak;  no mano a sennaay kadagiti bibig dagiti napukawan ti panagbiag;  no mano a namnama ti naawan gapu iti saem nga inpaayna.

Nakaro a bagyo, ta amin a pagbiagan ken tagtagainep ti tunggal pamilia ken indibidual ket karaman a naitayab.

Ti laeng koma maysa a napintas a damag a maidateng iti pagilian a nawara, ket ti panangabak ti maysa a bannuar nga idolo ti kaadduan.

Ngem daksanggasat, ta uray dayta a namnama ket nanabtuog nupay di koma met pagayatan a mapasamak.

Inaramid ngata met amin ni Pacquiao ti amin nga ammona tapno mangabak iti labanda ken ni Marquez, ngem laeng, saan amin a kanito ket mapasamak ti kayat ti tunggal tao.  Adda pagpatinggaan ti kabaelan.  Adda beddeng ti amin a mapasamak.  Naabak man ni Pacman, adda amin gapuna no apay.  A kas met laeng ti gapuna no apay a naisaplit iti deppaar ti abagatan ti rungsot ni bagyo.

Ngem ketdi, saan a dagitoy ti makalapped tapno saan a naragsak ni Pinoy iti daytoy a Paskua.  Adda latta isem iti bibig dagiti tattao iti napalabas a Paskua.  Kasla awan napasamak a didigra.  Kasla nangabak met laeng ni Pacquiao.#

Comments are closed.