Footer

BANNER NEWS: Saan a hot spot ti Ilocos Sur – PNP chief

SAN ILDEFONSO Ilocos Sur – Linawlawagan ni PNP Chief Director General Alan Purisima a saan a hot spot ti Ilocos Sur a kas maipadpadamag no di ketdi maysa daytoy a priority area a maikkan iti naan-anay nga imatang.

Kinuna ti heneral a kayat a sawen daytoy ti naing-inget ken nasapsapa a panagkuti ti puersa ti kapolisan tapno masigurado ti pannakaipakat ti naan-anay nga urnos ken talna ditoy.

Innayon pay ni Purisima nga adda tallo a rason no apay a nairaman ti Ilocos Sur iti 15 a probinsia a naideklara kas priority area. Umuna, ti kaadda ti political related violence a nairekord iti kallabes; maikadua, ti kaadda dagiti loose firearms ken ti kaadda dagiti crime groups nga agdakdakiwas ken adda pay laeng pangta iti internal security ditoy.

Kabayatanna, ni Purisima ti kangrunaan a sangaili iti pannakainagurar ti baro a police station ti ili a San Ildefonso bayat ti ibibisita ti hepe ti PNP idi Disiembre 27. Kadua ti Ilokano a heneral da Governor Luis “Chavit” Singson, Vice Governor Deogracias Victor “DV” Savellano, Congressman Ryan Luis Singson, Mayor Mark Anthony Purisima ken dadduma pay a lokal ken PNP officials iti probinsia.

Karaman pay a naiyawat ti dua a motorsiklo a mausar a pagpatrolia dagiti polis ditoy nga ili.

Dinawat ni Purisima nga agbalin koma dagitoy a naipaay iti San Ildefonso tapno lalo pay nga agtrabaho para iti napudpudno a serbisio dagiti polis ditoy tapno matagiben ti urnos ken talna ken maprotektaran ti seguridad dagiti umili.

Kinuna met ti gobernador a napintas a pasarabo manipud iti baro a PNP chief daytoy baro a PNP station ken motorsiklo itoy a panagsubli ni Gen. Purisima iti ili a nakayanakanna. Inyawat pay ti gobernador ti tseke nga aggatad iti P3 a milion iti lokal a gobierno ti San Ildefonso.

Inkari met ni Purisima ti panangipaayna kadagiti kasapulan ti baro a PNP station ken ti pannakaaramid ti maysa nga evidence room tapno saan a madadael ken mabaliwan dagiti makalap nga ebidensia a mamagbalin a naan-annayas ti pannakasolbar dagiti kaso kontra kadagiti managdakdakes. (Mancielito S. Tacadena)