Footer

Pagtagilakuan iti illegal a paputok, rinaut dagiti polis

CANDON CITY – Imbes a rag-o ti simmangbay iti daytoy a Chinese national iti idadateng ti Paskua, sakit ti ulo ti sinagrapna gapu iti dakkel a pukawna ken panagkakasona gapu iti panaglakona kadagiti illegal a paputok.

Idi agarup 10:15 ti bigat ti Disiembre 25, kas paset ti crackdown ti kapolisan kontra iti illegal a fire crackers, rinaut dagiti nagtipon nga elemento ti Candon police station ken ti BFP nga indauluan ni Police Inspector Feliciano G. Galdonez, Junior PCO, ken babaen ti direkta a superbision ni Candon Chief of Police PSupt. Marlo A. Castillo ket kinumpiskada dagiti nadumaduma a maiparparit a paputok a mailaklako iti Madarang Street, Barangay San Jose ditoy siudad partikular iti pagtagilakuan ti Ken Cruz y Marketing.

Maysa a Chinese national nga agnagan Ken Uy y Cruz, 33, naasawaan, ken agnaed iti Barangay San Jose, Candon City, ti akinkukua iti nasao a pasdek ken pakailaklakuan dagiti fire crackers ken pyrotechnics.

Idi sinitar dagiti polis ni Uy, mapapati nga awan ti naipakitana a dokumento nga aglako kadagiti paputok malaksid ti license to deal in fire crackers and pyrotechnic devices renewal nga addaan iti License No. DCB26-220607-03029 a namkuatanda a nangkumpiska kadagiti paputok.

Bayat ti panangimbentario dagiti polis kadagiti paputok, nasukalanda dagiti kinarton a paputok iti stockroom ti pasdek ket kiniddawda ti tulong ti Bureau of Fire Protection, Candon City nga indauluan ni SFO3 Elmer B. Ocampo, chief operatives/fire safety inspector tapno maammuanda no awan met la ti linabsing ni Uy mainaig iti fire code.

Nasukalan dagiti kameng ti BFP a naglabsing ni Uy iti RA 9514, kas iti kaawan ti fire safety inspection certificate (FSIC) para iti paputok ken iti panangipempenna kadagiti fire crackers ken pyrotechnics iti asideg ti nalaka a mauram a material.

Pakairamanan kadagiti nakumpiska dagiti sumaganad: 345 pakete ti piccolo nga addaan 10 boxes tunggal maysa; 192 pakete ti Saturn missiles; 57 pakete ti baby rocket; 104 pakete ti colourful butterfly; 60 pakete ti flying rockets; boxes cross fire 25 shots, 50 shots, 100 shots, 200 shots ken 300 shots; 71 boxes ti great bawang; 126 boxes 90 sec crackling assault; 46 boxes pop pop; 41 boxes twisting travellers; boxes ti golden sparklers; boxes ti colourful flash; 63 boxes Pacquiao ultraman; 45 boxes bell orchid; 30 boxes colourful butterfly; 7 boxes colourful chrysan tenium; 3 boxes prince of desert; 2 boxes 90 sec crackling assault; 3 boxes ti whistling moon thunder ken 1 box ti happy flower.

Sinaksian dagiti barangay officials nga indauluan ni Barangay Chairman Ernesto Abigania ti pannakaiwayat ti operasion.

Iti pannakaisurat daytoy, naipilan iti City prosecutor’s office ti kaso a panaglabsing iti RA 7183 and City Ordinance (Firecrackers Zone) maikontra ken ni Uy ken nai-docket iti babaen ti SFO3 Elmer B. Ocampo, Chief operatives/Fire safety inspector.#