Footer

2 nainbolbar iti aksidente ti lugan, di immabut iti baro a tawen

SANTA, Ilocos Sur – Dua a residente ditoy nga ili a pakairamanan ti maysa nga ubing ti saan a nakasarabo iti baro a tawen kalpasan a nainbolbar ti naglugananda iti nagsina nga aksidente idi malem ti Disiembre 29 ken 30 a puon ti nakatayanda.

Naideklara a natay iti  Metro Vigan Cooperative Hospital a nakaitarayanna ni Jun Jun Gacutan y Rialon, 7, residente iti Barangay San Nicolas, Candon City.

Malaksid ken ni Gacutan, nayospital gapu iti sinagrapda a dunor da Nimas Gacutan y Gadong, 32, naasawaan; Gerald Gacutan y Rialon, 3; Heremy Gacutan ly Rialon, 5’ ken Marife Gacutan y Rialon, 9, agpapada a residente iti nadakamat a barangay.

Segun iti report, idi agarup 3:11 ti malem ti Disiembre 29, agdaldaliasat ti Tricycle Maton a minaneho ni Nimas Gacutan nga agpaabagatan iti national highway a sakup ti Barangay Mabilbila Sur, idi kellaat a nagsardeng ti sarsarunuenna a L300 van gapu iti mapapati a panag-U-turn iti paggasolinaan ti sarsarunuen met daytoy a di nabigbig a lugan.

Kas resulta, nadungpar ti traysikel ti van ket nabaliktad iti tengnga ti kalsada a nakadundunoran dagiti pasahero ti traysikel a pasig nga ubbing.

Intaray dagiti residente ti nadakamat a lugar dagiti biktima iti ospital a nakaideklaraan ni Jun Jun Gacutan nga awanen ti biagna.

Saan a nabigbig ti nagmaneho iti van a naglibas kalpasan ti aksidente.

Kabayatanna, naideklara met a dead on arrival iti Gabriela Silang General Hospital, Vigan City, ni Nova Solomon y Querubin, 42, naasawaan, ken residente iti Barangay Banaoang, Bantay, Ilocos Sur gapu kadagiti nakaro a sugatna kalpasan ti aksidente a napasamak iti national highway a sakup ti Barangay Banaoang, Santa idi agarup 2:45 ti malem ti Disiembre 30.

Naammuan iti inbestigasion dagiti polis nga agpaabagatan ti Honda XRM motorcycle a minaneho ni Solomon ket iti salogan a paset ti Barangay Banaoang Santa, nagpreno daytoy ngem nagkaruskos ti lugan iti kannigid a paset ti kalsada a nakatinnagan ti biktima ken nagsagrapanna iti dundunor iti ulona.

Awan ti helmet ti biktima idi napasamak ti aksidente.

Kabayatanna, dakkel a problema ti nangsarabo iti maysa a residente iti Barangay Comillas South, Cervantes, Ilocos Sur gapu ta nakadungpar iti ubing idi aldaw ti Disiembre 30.

Saanen a naiyabot iti Bessang Pass Memorial Hospital  a sibibiag ni Shonlee Dumansi y Gaqui, 4, residente iti Barangay Acupan, Itugon, Benguet gapu kadagiti dunorna iti nadumaduma a paset ti bagina kalpasan a dinungpar ti van a minaneho ni Noel Domoslog y Tirigo, 37, naasawaan, sadiay Cervantes-Mankayan road iti Sitio Tay-ak, Barangay Comillas North Cervantes.

Mapapati a bimmallasiw ti ubing iti kalsada a puon ti nakadungparanna.

Boluntario a simmuko ni Domoslog iti polis ti Cervantes.#

Comments are closed.