Footer

BANNER NEWS: Extortionist, natiliw iti entrapment operation

CAOAYAN, Ilocos Sur – Nanabtuog iti ima dagiti pannakabagi ti linteg ti maysa a masuspetsa nga extortionist iti entrapment operation nga insayangkatda maikontra iti suspek iti Sitio Pagbaksayan, Barangay Don Lorenzo Querubin, Caoayan, Ilocos Sur idi tengnga ti aldaw ti Disiembre 30.

Inaresto dagiti polis ditoy nga indauluan ni Senior Inspector Edmar P. Quiton, hepe ti polis, ken dagiti miembro ti Ilocos Sur PAIDSOTG ken kameng ti media manipud NBN Ilocos ni Maricar Lazarte y Raboy, 31, naasawaan, food server, ken residente iti Barangay Ayusan Norte, Vigan City, ditoy nga ili bayat iti akto a panangawatna iti kuarta manipud ken ni Michelle Avila y Queypo, 37, naasawaan, ken residente ti Barangay Anonang Menor.

Nakumpiska iti ikut ni Lazarte ti marked money nga agdagup iti P5,000.00, maysa a unit ti Star Mobile cellphone ken ti nagsakayanna a Rusi motorcyle nga addaan plate number 9089-IB.

Nagpatulong ni Avila iti polis mainaig iti panagdawat ti suspek iti kuarta kenkuana kas sukat ti pannakaikkat ti naganna iti listaan dagiti drug personalities iti probinsia.

Segun pay ken ni Avila, nagpabigbig ni Lazarte a maysa a PDEA agent ken nagballaag a no saan a mangted iti kuarta tapno maikkat ti naganna iti listaan dagiti drug personalities iti probinsia, adda dakes a mapasamak kenkuana ken ti pamiliana.

Mapapati a nangted ni Avila iti P60,000.00 ken ni Lazarte idi umuna a lawas ti Disiembre 2012 ken sabali pay a P67,000.00 idi Disiembre 27, 2012.

Mapapati a dimmawat manen ni Lazarte iti kuarta ngem nagpatulongen ni Avila iti polis ket plinanoda ti pannakaisayangkat ti entrapment operation maikontra iti suspek.

Idi agarup 12:00 ti aldaw iti Disiembre 30, nakisinnarak ni Avila ken ni Lazarte iti national road sadiay Sitio Pagbaksayan, Barangay Don Lorenzo Querubin, Caoayan, tapno iyawatna ti kuarta.

Simmangpet ni Lazarte a nakalugan iti Ruzi a motorsiklona ket apaman a naiyawat ni Avila ti P5,000.00, dagus a nagtignay dagiti polis ket tiniliwda ti suspek.

Iti pannakaisurat daytoy, adda pay ni Lazarte iti kustodia dagiti polis.#

Comments are closed.