Footer

Dagiti angel iti daga

Komentario ni Danilo Antalan

 

Nakaal-alinggaget!  Maysa a pagteng a maysan a batibat a kanayon a mangal-alia, saan laeng idiay Amerika, no di ket iti sangalubongan.  Ta asino aya ti di marimon ken di matukay ti riknana?  Dagiti inosente, naamo a rupa, anghel iti daga—dagiti ubbing, ket mapapatay iti maysa a pagteng a di ninamnama.

Dagiti ubbing a ti ammoda laeng ket agkatawa no naragsakda, ken agsangit no mapasaktanda, ket apayen a nagbalinds a biktima kadagiti minamaag ken minumono a panunot dagiti nataengan?

Agay-ayam ken agbasbasa dagiti ubbing iti bassit a komunidad iti Sandy Hook Elementary, idiay Newtown, Connecticut. Awan ti pakpakada a simrek ti maysa nga agkabannuag a managan Adam Lanza, imetna dagiti agkakangato a kalibre ti paltog, ket iti awan a rason, pinagbusina dagitoy a paltog, awan masnop ti turongenna.  Basta ti birbiroken dagitoy a buli, ket ti narasi a lasag a masugatanna.  Awan sardayna, agingga a naibus dagiti bala.

Idi nagsardeng ti batibat nga uni ti paltog, naidasayen dagiti ubbing, agtawen manipud lima ken agpangato, agsaysayasay ti darada.  Ti dadduma kadakuada, natayen, ti dadduma, agngangabit ken patay.

Idi bilangen ida dagiti otoridad, 20 ti natay nga ubing, 6 ti nataengan.  Karaman ti natay ti suspek a ni Adam.  Karaman pay iti natay ti ina ti suspek a mapapati a pinaltogan met laeng ti suspek.  Paltog ti ina ti suspek ti naaramat iti masaker.

Nagladingit ti lubong iti pasamak.  Ta asino ti di agsangit iti panakatay kadagiti inosente nga ubbing iti awan kaes-eskanna a banag?

Adu ti agdamdamag, apay a saan a nasalakniban dagitoy nga ubing, idinto a ti lugar nga ayanda, ket namnamaen a maprotektaranda?  Ti Estados Unidos, a dandani amin a garaw ken panggep dagiti kabusor a pagilian, ket ammodan.  Ngem apayen ti adda iti balayda, ket dida nasalamaan, tapno iti kasta, saan a napasamak daytoy a pasamak.

Ken apay a dagitoy nga ubing, nagcu-cute, ti biktima?

Halos kinagiddanna met laeng dayta ti panakabiktima met laeng ti duapulo ket dua (22) nga ubbing idiay Chenpeng Village Primary School, iti probinsia ti Henan, China.  Nabagbagsol babaen met laeng iti maysa a lalaki a no ar-arigen, adda littik ti panunotna a managan Min Yingjun.  Nakigtot ti sibubukel a Tsina iti trahedia a napasamak.

Masinunuo nga awan iti simbeng iti panunot dagiti kriminal idi inaramidda dagitoy a panangbagsol.  Ta no addaanda iti simbeng iti panunot, dida koma naaramid daytoy.

Ditoy Pilipinas, itay napalabas a bulan, nagbalin met laeng a sentro ti damag ti maysa nga ama a nanggandat a mangpapatay iti anakna a bulan pay laeng ti biagna ditoy lubong.  Ginandatna pay a puoran.

Saan laeng a dagitoy ti pasamak a pannakabiktima kadagiti ubbing.  Adun dagiti nailanad kadagiti blotter iti polis, ken iti pakasaritaan iti lubong.  Ken adun dagiti di naisursurat ken naam-ammuan a nagbalin laengen a palimed ti maysa a maseknan.

Ala, uray umasidegtayon, ditoy probinsia, ili wenno barangay, adda dagiti nakakalkaldaang a pasamak a pannakapapatay kadagiti ubbing babaen kadagiti managbarbara nga ulo ti suspek. Adda dagiti ubbing a narungsot a makabkabil, madusdusa, wenno marames babaen kadagiti nataengan.

Iti agdama, maysa kadagiti kangrunaan a maidurduron ket ti Anti-Corporal Punishment Bill, wenno ti gakat a panangdusa kadagiti nataengan a nalabes a mangdusa kadagiti annak, estudiante wenno kabagian nga ubbing.  Ngem ngata, mabalin nga ilawlawatayo ti panangkita iti puon ken gapu, no apay a mapaspasamak dagitoy a panangpapatay ken gandat a panangpapatay kadagitoy nga ubbing.

Ayat, daytoy ti kangrunaan a kasapulan dagiti ubbing, dagiti ubbing nga awanan pay laeng gaway ken kapasidad.  Ubbing a nagdalanan ti amin a nataengan ditoy a lubong.  Ayat met laeng ti mangiliklik kadakuada iti aniaman a pasamak ti pannakadadael iti biagda.  Nangruna no ammo ti maysa a nagannak, wenno ti lugarna, wenno probinsia nga ikkan seguridad ti pagtaengan, pagadalan, wenno pagay-ayaman a naruay nga ayanda.

Ngem ngata, immun-unada ta natudinganda nga agbalin a babassit nga anghel iti langit.  Isuda ken dagiti dadduma pay nga ubbing a nagbalin a biktima ken sakripisio dagiti ritual ken tradision dagiti maag a tao.  Isudanton ti mangaywan kadagiti padada nga ubbing tapno masalakniban iti kumarkaro a kinadangkes ken kinaawan konsensia ti agdama a kasasaad.

Ngem karaman itoy a panata ti kararag a sapay koma ta awanton ti mabiktima a kerubin iti daga.  Ta no isuda ti pimmusay, lubong ti agsangit.#