Footer

Guardia, biktima ti Agaw-Armas Gang

STA. MARIA, Ilocos Sur – Saan laengen nga iti Kamanilaan ti pagrairaan ti grupo dagiti aggaagaw iti armas, pati payen ditoy Ilocos Sur.

Nagreport iti polis ni Reynaldo Apos Velasco, 32, baro, security guard, ken residente iti Barangay Pidipid, La Paz, Abra, nga inagaw ti dua a lalaki a mapapati a kameng ti Agaw-Armas Gang ti paltogna idi agarup 3:15 ti agsapa ti Enero 4.

Segun ken ni Apos, bayat ti panagbantayna iti M Lhuillier Pawn Shop a masarakan iti Barangay Poblacion ditoy nga ili, dua a lalaki a naglugan iti motorsiklo ti nagsardeng sada inasitgan ken nagpabigbig nga agency security inspector ti Urduja Security Agency.

Mapapati a binirok dagiti suspek ti lisensia ti paltog ken ti security identification card license ni Apos.

Kellaat, maysa kadagiti suspek ti nanggammat iti service firearm ni Apos a cal. 38 revolver a naisabbikel iti siketna sana dagus nga inikkat dagiti bala.

Impalladaw ti sabali a suspek ken ni Apos ti maysa nga identification card sada naglibas a nagturong iti saan nga ammo a destinasion.

Nailanad iti identification card ti nagan a Wilson L. Damayo ti #22 1st San Gabriel Extension, Santolan, Pasig.

Nangiwayat dagiti polis iti hot pursuit operation maikontra kadagiti suspek ngem negatibo ti resulta ti panagbirokda.

Agtultuloy ti panagimbestiga dagiti polis mainaig iti nasao nga insidente.

Daytoy ti damo a gundaway nga adda guardia a naagawan iti paltog iti daytoy nga ili.#

Comments are closed.