Footer

Naibulos a kappisa a pawikan, immabuten iti 800

SAN JUAN, La Union – Immabuten iti aganay a 800 dagiti kappessa a pawikan a naibulos iti baybay agingga iti agtapos ti tawen 2012, daytoy ti inreport ti Coastal Resource Management Project, Pawikan Conservation Project a nakabase iti Barangay Ili Norte ditoy .

Itay laeng nabiit, sabali manen a nasurok 100 a kappessa a pawikan ti imbulos ti nasao a hatchery iti baybay.

Mapattapatta nga adda pay nasurok a duapulo nga umok dagiti pawikan iti igid ti baybay ti nasao a barangay ket umabot iti nakurang a dua ribu dagiti itlog a saan pay a napessaan.

Salsalakniban ti gobierno munisipal daytoy a lugar agsipud ta ditoy ti turongen dagiti pawikan no agitlogda.

Karaman ti pawikan kadagiti endangered species a kasapulan a masalakniban tapno saanda a maungaw.#