Footer

Paglakuan dagiti illegal a paputok, rinaut dagiti polis

CAMP ELPIDIO QUIRINO, BANTAY, Ilocos Sur – Kas panangipatungpal iti pammilin ni PNP Chief Director General Alan Purisima, nagsasaruno dagiti operasion nga insayangkat ti kapolisan maikontra iti panaglakuan iti illegal a paputok ditoy probinsia sakbay ti isasangbay ti baro a tawen.

Rinaut ti nagtitipon nga elemento ti RID PRO1, PIB Ilocos Sur PPO, ISPPSC, ken police stations ti Cabugao, San Juan, Magsingal ken Sto Domingo dagiti paglakuan iti fireworks ken pyrotechnics kadagiti nadakamat nga il-ili  ket kinumpiskada dagiti mailaklako nga illegal a paputok.

Nakasamsam dagiti polis iti walo pedaso a pla-pla, 21 boxes ti piccolo, 7 pedaso a lolo thunder ken 2 boxes ti dancing fire iti Magsingal; 60 boxes ti piccolo, ken 2 boxes ti watusi iti Parada, Sto. Domingo, idinto a 22 boxes ken 15 pedaso ti piccolo ken 3 pieces ti og iti Vacunero, Sto. Domingo; 247 boxes ti piccolo, 53 boxes ti pla-pla ken 6 pedaso ti whistle bombs iti Cabugao; ken  52 boxes ti piccolo iti San Juan.

Nangiwayat met iti operasion maikontra iti illegal a paputok dagiti intel operatives ti Candon City babaen ti direkta a superbision ni Supt. Marlo Castillo, hepe ti polis, partikular iti dayaen a paset ti Candon Arcade, Barangay San Jose idi agarup 9:00 ti bigat ti Disiembre 31 a nagresulta iti pannakasamsam ti 40 boxes a Pacquiao Ultramas  wenno piccolo.

Nakadlaw ti aglaklako kadagitoy a paputok ket tinarayanna dagiti lakona idi umasideg dagiti polis.

Iti Vigan City, nagresponde dagiti polis iti panangidaulo ni PInspector Glenn Dulay idi nakaawatda iti report  manipud iti maysa a maseknan nga agindeg nga adda aglaklako iti illegal a paputok iti Barangay Nagsangalan idi agarup 1:28 ti malem ti Disiembre 31.

Ngem idi makasangpet dagiti polis iti nasao a lugar, nakalibasen ti di nabigbig nga aglaklako a nangpanaw lattan kadagiti lakona a pakaibilangan dagiti mother rockets (kuitis), pyrotechnic/fireworks, judas belt 100 rounds ken 400 rounds, piccolo, ken pop pop.

Impan dagiti polis dagiti paputok iti police station para iti umisu a disposision.

Kabayatanna, nangiwayat iti last minute inspection iti paglakuan ti paputok iti daan a tiendaan publiko ti nagtipon a bunggoy ti polis ken kameng ti Bureau of Fire Protection ti Tagudin nga indauluan da PSenior Inspector Napoleon Gao-ay ken SFO4 Henedino Reduca idi agarup 10:30 ti rabii ti Disiembre 31 a nagtungpal iti pannakaisuko ti maysa a box a naglaon iti 5 a rim wenno 500 a plapla.

Maysa a Ronald Mendoza, stall owner ken residente iti Barangay Rizal, Tagudin, ti boluntario a nangisuko kadagiti paputok a kunana nga old stock.

Kas paset ti tignay ti gobierno nangruna ti Department of Health a panangpabassit dagiti matay ken masugsugatan iti panangsarabo iti baro a tawen, imbilin ni Purisima ti naing-inget a crackdown kadagiti aglaklako, agiwarwaras ken agusar iti illegal a fireworks ken pyrotechnics.

Sagudayen ti RA 7183, wenno linteg a mang-regulate iti pannakailako, panagpartuat, pannakaiwaras ken pannakaaramat iti firecrackers ken dadduma pay a pyrotechnic devices, karaman kadagiti paputok a maiparit ken kumpiskaen dagiti polis ti watusi wenno dancing firecrackers, piccolo, super lolo ken atomic big triangulo, mother rockets, lolo thunder, pillbox, boga, big judas belt, big bawang, kwiton, goodbye Philippines, kabasi, atomic bomb, five-star, pla-pla, og, giant whistle bomb ken dadduma pay nga awan ti labelna a paputok.

Sagudayen ti linteg a dagiti matiliw nga aglabsing ket mamulta iti saan a nakurkurang ngem P20,000.00 wenno nasursurok ngem P30,000.00 wenno pannakaibalud a saan a nakurkurang ngem innem a bulan wenno nasursurok ngem makatawen wenno agpada a multa ken pannakaibalud segun iti diskresion ti korte, malaksid ti pannakakansela ti lisensia ken business permit ti aglaklako ken panangkumpiska ti gobierno iti stock wenno inbentariona.#

 

Comments are closed.