Footer

Senadobela

Ni Danny Antalan

 

Mahilig iti telenobela ni Pinoy.  Iti kinaubing da Mara Clara nga inakem idi dagiti ubbing a da Judy Ann Santos ken Gladys Reyes nga itan agpadan a naasawaan, ni Marimar a saan laeng ti naisangsangayan ti kinapintas ken kinalaing ti panagsalana, ken ti panagsikat dagiti Koreanobela wenno dagiti drama ti telebision manipud South Korea.  Agingga ita, no immalasiete ti rabiin, dagiti telebision iti pagtaengan ket nakatutok kadagiti nararabaw a sarita ngem umatiperper nga eksena ti sakit.

Ket ne, naisursurot sa metten ti Senado iti drama kadagiti telebision.

Starring  da Senador Juan Ponce Enrile ken Miriam Defensor Santiago; supporting actors da Senador Antonio Trillanes IV ken Alan Peter Cayetano.  Extra latta metten iti pabuya iti live sessionda dagiti dadduma pay a senador.

Kasla nagganas a buyaen ti panagpipinnalatipat ti kapanunotan ken pengnget ti balikas dagiti masisirib a binutosantayo.  Dida maibbusan iti rason kadagiti piltak a maibatbato iti tunggal maysa kadakuada.  Ania ketdin a siglatda a dumanog ken ag-counter attack.  Kasla koma ti eksena a climax nga agrinrinisiris dagiti artista ti telenobela.

Ngem tono kuan, mapanunottayo, kasla sitayo nga umili ti maabakan iti daytoy a mapaspasamak kadakuada a.  Kasano?  Agsipud ta suelsuelduantayo ida nga agpanday kadagiti linteg a makatulong la unay iti panagdur-as ti panagbiagtayo ken kitaenda ti salun-at, rebbengen ken kasasaadtayo.  Saantayo met suelduan ida tapno tumakderda iti uneg iti Senado, sumango iti mikropono a naka-Amerikana, ken tumalanggutang lattan kadagiti banbanag a mangtiro kadagiti padada a binutosantayo.

Hmmm, kasla isuda pay ketdin ti agnumar kadagitoy nga ar-aramidenda.  Ta kasano? Siempre, libre ti media mileage da.  Umasideg sa ti eleksion, di ketdi.  Ket iti inaldaw a panakaitapkal ti rupada iti telebision, nalaklakanto ngarud ti pannakalagip ti apeliedoda intono panagbubutos.  Dakes wenno mayat a pannakadakamat ti nagan, kunada, publicity latta dayta.

Nagngina aya ti bayadan iti tunggal spot ti informercial ken political advertisement iti telebision ken radio.

Bayat iti impeachment trial ken ni sigud a chief justice Renato Corona, kasla mayat pay met ti langenlangenda.  Kasla agkakadduada pay met a mangpatapuak iti kangatuan a tugaw iti hudikatura.  Nagballigida a nangpatakias ngarud ken ni Corona iti Korte Suprema.

Idi bumayag, addan ti sayangguseng a panangpatapuakda ken ni Senador Enrile iti tugawna kas Senate President.  Ngem awan ti rummuar a nagan no sino ti mangaramid wenno mangplano.  Rimmuar ti isyo a paripirip a relasion ni Enrile ken ti chief of staff na.

Idi kuan, timpuar ti riri da Senador Enrile ken Senador Trillanes a nagramut iti isyo iti Tsina.  Sinaruno manen ti sayangguseng ti pannakapatapuakna.

Itay nabiit, rimmuar ti isyo mainaig iti cash gifts ni Enrile kadagiti padana a senador.  Adda uppat nga inikkanna iti P250,000 laeng, kabayatanna a 18 ti immawat ti P1.6 milion.  Dagitoy nga uppat  nga immawat ti basbassit ket dagiti kritikona a da Senador Trillanes, Santiago, ken ti agkabsat a Cayetano.

Rimmuar manen ti pannakasukat ni Enrile kas Senate President.  Ket iti naminsan a session, imbagan ni Enrile a bakante ti nasao a puesto tapno mabutosanen dagiti kayatna a mangsukat kaniana.  Ngem idi naisayangkat ti butos, ad-adu nga amang ti bilang ti senador a nagbutos iti confidence ken ni Enrile.  Awan ngarud nagmamaayanna.

Ngem kadagiti simmaganad a pagteng, iti Senado, nagtultuloy ti riri iti nagbabaetanda:  Enrile versus Trillanes, Cayetano ken Santiago.

Ama, kasla di maputpot dagiti panagsisinnukat kadagiti pilosopo, takder ken banat ti tunggal maysa kadagiti senador.  Kimmaro ta  nairaman pay ti personal a biagda.

Ay biag aya, asideg ngaminen ti eleksion!

Tunggal maysa, kayatda ti agbalin a bida iti drama iti lehislatibo wenno senadobela.

Diak mautob ti relasionda a kas kameng ti lehislatibo iti ar-aramidenda a riri bayat ti session nga isaysayangkatda.  Riri tunggal interview a maisayangkat kadakuada.  Riri kunak a, ta kasla diak maawagan ti debate daytoy, nangruna no para iti bagida ti salsalaknibanda.

Ket ni Pinoy, agsipud ta mahilig iti teleserye, kasla latta metten mangsubsubaybay iti drama series iti telebision.  Amangan pay ketdi no makilaban iti ratings ti session ti Senado kadagiti high rating tv series iti ABS-CBN, GMA7 ken ABC5.  Wen, mabalin met a mailinia iti Princess and I, Indio, Kidlat, Please Be Careful with My Heart ken dadduma pay a pabuya.

Ania ngarud koma met ti titulona no kas pangarigan: hmm, mabalin ngata metten ti  “Senado Ng Buhay Ko”.#

Comments are closed.