Footer

3 makisugsugal, natamaan iti stray bullet

VIGAN CITY – Tallo a lalaki ti biktima ti naiwawa a bala bayat ti panagsusugalda iti maysa a natayan iti Barangay 4, ditoy siudad idi Pebrero 6.

Iti pannakaisurat daytoy, adda pay la iti Gabriela Silang General Hospital da Jayson Gonzales, 26, taga-Barangay Bayubay, San Vicente, Ilocos Sur ken Clifford Rafanan, 32, taga-Barangay Pantay Fatima, Vigan City idinto a maag-agasan iti Metro Vigan Cooperative Hospital ni Gerald Villareal, 28, taga-Barangay 4, Vigan City.

Nagsagrap iti sugat iti lansalansa ti sakana ni Gonzales, iti patongna ni Rafanan idinto nga iti makannigid a sakana ni Villareal.

Segun iti report, agsusugal dagiti biktima ken dadduma pay idi limmabas ti maysa a motorsiklo a sinaruno ti maysa a kotse ket mapapati a nagpaputok dagiti naglugan a nakatamaan dagiti biktima.

Nagresponde dagiti polis ket nangiwayatda iti hot pursuit kadagiti nagpaputok ngem saanda a nakamatan dagitoy.

Madama ti inbestigasion no asino dagiti nagpaputok a nakatamaan dagiti biktima.#