Footer

Ayan-ayat A Di Inumag Ti Panawen

Sarita ni Danilo S. de Guzman

Maikadua a paset

 

Adda tarheta a nakaisuratan ti adres, nabasak a taga-Quezon City ti makinkukua, adda met ti selpon namberna. Imbulsak iti likudan ti pantalonko a nangisit.

Ania ti aramidek? Saanko nga ugali ti mangtagikua iti saanko a kukua. Dayta ti nainget unay a pannursuro dagiti dadakkelko nga agpadpada a titser iti elementaria. Taltallokami nga agkakabsat: ti inaunaanmi a balasang ket maestra met iti sekundaria; ti manangek ket graduado iti Bachelor of Science in Information Technology ken agtrabaho a kas call center agent sadiay Clark, Pampanga; sisiak a lalaki ken buridek.

Inkeddengkon ti nagawid ta diakto met masursurotan iti aramidek—no saankonto pay a masinuo no sadino ti turongek isu a napadpadak iti Burnham Park a diak napupuotan, sa ita adda pay daytoy napidutko a wallet a mangmunimuni no ania ti aramidek itoy a nayon a nutnutnotan ti mugingko, nawadwad met ti rinibu a linaonna, kunam sa.

NASUROKEN a kagudua nga orasko iti sanguanan ti telebision ngem diak maikonsentret ti buybuyaek iti skycable, ta maipapan ti napidutko a wallet ti nutnutnotan ti panunotko. Nawadwad ti linaonna ta binilangko iti siledko apaman a nakasangpetak. Nineteen thousand eight hundred ninety!

“Bryan, anak, ania kadi ti pakariribukam? Itay pay laeng a nauneg ti pampanunotem ken dika matimtimek…?” ni mamang.

Nagsabat dagiti matami ken ni papang iti kannigidko, ta apagisu nga ibabana ti basbasaenna nga aginaldaw a national broadsheet, ngem intuloyna met laeng ti nagbasa; tinaliawko ni mamang nga itan ket madaman nga agburborda iti puraw a supot ti pungan. Immangesak iti nauneg.

“’Mang, adda napidutko a wallet…” Insardeng ni mamang ti aramidna. Tinaldiapak met ni papang a nangibaba manen ti basbasaenna a pagiwarnak, a nalabit a dumngeg a nalaing iti ibagbagak. Kinautko ti wallet iti bulsa ti nangisit a pantalonko ket inlapagko iti center table

“Apay a dimo isubli iti makinkukua? Mano ti linaonna?” ni manen mamang.

Imbagak dagiti linaonna. Imbagak pay ti kuentas. Ken no sadino ti nakapidutak.

“Apay a dimo isubli iti makinkukua? Kaasi met. Laglagipem koma a kanayon, anak, a nagbanbannogan ti makinkukua dayta. Iti kaanoman, saanmo a paginteresan a tagikuaen ti saanmo a kukua. Nasken nga itedmo dayta iti makinkukua. Laglagipem koma a kanayon, no ania ti inaramidmo iti padam a tao, maaramidto met kenka,” naalumamay ti panangibaga ni papang.

“Mabalin a natinnagna dayta a dina napupuotan kabayatan nga agpaspasiar. Kaasi met. Amangan no agkamkammaulawen nga agbirbirok ita. No awanen kuartana, makaawid pay sadiay Quezon City? No adda  selponna, apay a dimo awagan wenno iteks?” binagi ni mamang. “Inka lattan mangala iti kuarta idiay walletko, paglodmo ken iramanmon ti gastosem iti panagbirokmo iti trabaho.” Kunana a kasna la ammo nga awanen a pulos ti kuartak, nga awan lodko idi pay la kalman isu nga imbatikon ti selponko iti lamesita iti salas— nasayaat la unay ta mabasansa dagiti nagannak ti situasion dagiti annakda?

Naglodak. Inawagak ti makinwallet. Nariknak ti ragsak iti timek ti akinwallet idi simmungbat. Itay pay la kano a sapsapulenna ta napateg kenkuana ti kuentas—ta katukad ti biagna. Garalgal pay ketdi ti bosesna. Pangaasik kano ta itedko kenkuana. Kiniddawna a sarakek iti uneg ti maysa a Chinese Restaurant ti maysa nga otel iti kanto ti Assumption Road ken Session Road. Indetaliena no kasanok a maammuan ti kinaasinona.

Sinarakko. Agsipud ta manmano ti kustomer nga adda iti uneg, ti maymaysa a lakay iti asideg ti tawa a tumannawag iti Session Road ti pattapattak a kasinnarakko, segun iti deskripsion ti suotna a nalabaga a diaket, nakaantiparra, pangubanen dagiti buokna, ket pattapattak a kas met la kaniak nga agtayag iti lima a kadapan ken walo a pulgada. Kalalainganna ti pammagina. Immasidegak.

“Excuse me, sir…kayo po ba si Mr. Nicolas Barnacha?”

Naisem ti lakay a nagtung-ed. Inyupreserna ti tugaw.

Madlawko ti naglalabbet a rikna iti rupa ken tigtignayna, kasla magagaran unay a makaiggem manen iti walletna. Inikkatna ti antiparrana ket indissona iti lamisaan, maanninaw itan iti lalo pay a gagar ken ragsak dagiti naraniag a matana.

Inyawatko ti wallet. Nasdaawak ta kasla maganatan a nangbukra ket inruarna a dagus ti kuentas ket inag-agkanna. Napaangesak iti nauneg ta maimatangak a tumtumrem ti luana iti paningkiten a mata na. Iti suli ti panunotko, napateg unay kenkuana ti kuentas—sentimental value? Wenno adda napateg nga istoria ti kuentas? Pinaliiwko lattan. Ta kas kuna dagiti dadakkelko nga adda dagiti babassit a banag a kasla kadakkel ti lubong ti kaipapananna. Mabalin a kastoy ti pakasaritaan daytoy a kuentas.

“I-im s-sorry, Bryan, no nagbalinak nga emotional iti pannakaisubli kaniak daytoy a kuentas…” kinunana kbayatan iti panangpunasna iti panio kadagiti matana.

(Adda tuloyna)