Footer

Dayag ti Ilocos Norte, nakoronaan a Miss Saniata ti Ilocos Sur 2013

BANTAY, Ilocos Sur – Taga-Bangui, Ilocos Norte ti nakoronaan a Miss Saniata ti Ilocos Sur 2013 iti pageant a naaramid iti Quirino Stadium a masarakan iti beddeng ti Vigan City ken daytoy nga ili idi Pebrero 2.

Inatiw ni Danna Javier, ti dayag manipud iti nadakamat nga ili a pakasarakan kadagiti windmills, dagiti kinasalipna a mutia manipud iti Ilocos Sur, La Union, Pangasinan, ken Ilocos Norte iti panangiyalatna iti kina-Miss Saniata ti Ilocos Sur 2013, tampok a pabuya iti pannakaselebrar ti Kannawidan Ylocos Festival a nangrugi idi Enero 29 ken nagpatingga idi Pebrero 4.

Iti pannakakoronana a Miss Saniata ti Ilocos Sur, inawat ni Javier ti P100,000.00 a premiona ken isunto ti mangibagi iti Ilocos Sur iti maysa a nasional beauty contest.

Inyalat pay ni Javier ti Best in Swimsuit award.

Ni Jennyline Carla Malpaya, taga-Sta. Maria, Ilocos Sur, ti nakagun-od iti maikadua a puesto ket nakoronaan a kas Miss Saniata ti Ilocos Sur-World. Immawat ni Malpaya iti P75,000.00 a premio.

Napili ni Rosanna Andrea Reniva a kas Saniata ti Ilocos Sur-Environment ket inyawidna ti premio a P50,000.00. Napadayawan pay daytoy dayag a taga-San Juan, La Union a Miss Congenality.

Inyawid met ni Angelica Fernandez, mutia ti Caoayan, Ilocos Sur ti titulo a Model of the World-Philippines ket immawat iti P40,000.00.

Napili met ni Catterlie Mae Umalos ti Galimuyod, Ilocos Sur a First Runner-up, ken ni Annalita Vizcarra ti Urbiztondo, Pangasinan a Second Runner-up.  Napili pay ni Vizcarra kas Best in Long Gown idinto a Best Designer ni Janvan Paquing, miembro ti Ilocos Sur Designers Guild, a nangdisenio iti inrampana a gown ket immawat iti P15,000.00 a premio.

Ni Sahvenna Jane Florentino, mutia ti Siudad ti Laoag, ti nangkuykoy kadagiti special awards a pakairamanan ti Star of the Night, Best in Talent, Miss Photogenic ken Ilocanos Choice ket inyawidna ti P20,000.00 a premiona kadagitoy a pammadayaw.

Ti salip iti kina-Miss Saniata ti tampok a pabuya ti Kannawidan Ylocos Festival a maang-angay iti maudi a lawas ti Enero ken umuna a lawas ti Pebrero kas panangselebrar ti Ilocos Sur iti panagwaywayasna a probinsia idi Pebrero 2, 1818.

Iti daytoy a tawen, duapulo ket dua a mutia ti nagsasalip para iti kina-Miss Saniata ti Ilocos Sur 2013. (Karaman ti report ni Mancielito S. Tacadena)