Footer

Uppat nga annak ti I. Sur, immawat iti Fr. Burgos Achievement Award

BANTAY, Ilocos Sur – Uppat nga annak ti Ilocos Sur ti impaayan ti gobierno probinsial iti Fr. Burgos Achievement Award  iti seremonia a naangay ditoy nga ili idi Pebrero 2 a pannakaselebrar ti Maika-195 nga anibersario ti Ilocos Sur kas agwaywayas a probinsia.

Naiyawat ti Fr. Jose Burgos Achievement Award kada Philippine National Police Chief Director General Alan Lamadrid Purisima, Atty. Nonnatus Ceasar Rojas, Dr. Josefino Comiso, ken Danilo Antalan kas pammigbig ti gobierno probinsial iti dakkel a nagapuananda iti  napilida a tay-ak a nakaited iti pammadayaw iti probinsiada.

Nabigbig ni Purisima, tubo ti San Ildefonso, Ilocos Sur, ken agdama a hepe ti PNP, iti benneg ti Police Service; ni Rojas (San Vicente), mangidadaulo iti National Bureau of Investigation,  iti benneg ti Public Service; ni Comiso (Narvacan),  sientista iti National Aeronautics and Space Administration (NASA) sadiay Estados Unidos, iti benneg ti Siensia; ken ni Antalan (Candon City), nagab-abak kadagiti naruay a pasalip iti litertura a pakaibilangan ti Palanca Awards, iti benneg ti Literatura.

Lima met a prominente nga umili iti probinsia ti immawat iti Fr. Jose Burgos Special Awards a pakaibilangan da Mayor Carlos Asuncion, Mrs. Divina Quemi,  Mrs. Zenaida Pulido, Justin Matthew Lapastora ken Marcelo Peralta gapu iti naipaayda a pakabigbigan iti probinsia.

Nabigbig ni Asuncion (Sta. Catalina, Ilocos Sur) gapu iti pannakapadayawna a  kas Model OFW Family;  ni Quemi (Caoayan), general manager ti Nueva Segovia Consortium of Cooperatives (Caoayan) gapu iti pannaakapadayawna kas  Outstanding Cooperative Manager iti rehion Uno; ni Pulido (Bantay) , presidente ti Barangay Health Worker iti Ilocos Sur, gapu iti pannakapadayawna kas maysa kadagiti National Outstanding Barangay Health Worker, Justin Matthew Lapastora, (Sta. Catalina) gapu iti panangabakna iti International Math Olympics sadiay Singapore ken ni Marcelo Peralta (Banayoyo), gapu iti pannakapadayawna kas Outstanding Farmer on High Value Commercial Crops iti kaudian a Gawad Saka Awards.

Immawat da Lapastora ken Peralta iti sag-P30,000.00 a premio. (Karaman ti report ni Mancielito S. Tacadena)

Comments are closed.