Footer

2,000 nagrali, prinotestaanda panagminas iti black sand, political dynasty

VIGAN CITY – Indauluan ti simbaan ti maysa a rali kontra iti panagminas iti black sand ken political dynasty iti probinsia sadiay Plaza Burgos ditoy idi Pebrero 9.

Mapattapatta nga agdagup iti 2,000 dagiti nagrali nga indauluan ni Arsobispo ti Nueva Segovia Ernesto Salgado ken nakipartisiparan dagiti papadi, mamadre, sektor ti relihion a pakaibilangan ti Ilocos Sur Ecumenical Ministry (ISEM),   ti environmentalist group a Defend Ilocos Against Mining, Catholic public schools, seminarista, estudiante ken dadduma pay a maseknan a grupo tapno protestaanda ti panagminas iti black sand ken iti dinastia politikal iti probinsia.

Addaan iti tema a “Saluadan ti Igid ti Baybay, Tubngaren ti Bileg-Kinaturay”, nangrugi ti rali iti alas dos ti malem ti Pebrero 9 a nakaipalaonan ti walk for the environment,  karkararag, kankansion,  solidarity statements ken nagngudo iti pannakaipatangatang ti kararag a “Bumangonka, Ilocos Sur”.

“Vox populi, vox dei (Timek dagiti tattao ti timek ti Dios),”  daytoy ti kangrunaan a mensahe ni Arsobispo ti Nueva Segovia Ernesto Salgado bayat ti interbio kenkuana ti media.

Indagadag ni Salgado ti panangipapuso dagiti tattao iti awag a mangsalaknib iti aglawlaw ken denggen dagiti agtuturay ti kalikagum dagiti nakipaset iti rali.

“Ket nagtimek ti umili a tarigagayda a maisardeng ti black sand mining,” kinuna met da Father Sammy Rosimo ken Father Rabe idinto nga innayonda a “masilawan koma ti puso” dagiti maseknan iti daytoy a timek ti umili ta “isu ti timek ti Apo”.

Idi dinamag dagiti kameng ti media no asino ti partikular a kayatda a pangipaturongan iti protestada, kinuna dagiti dua a padi nga “amin a maseknan iti pannakaisayangkat daytoy black sand mining, ahensia ti gobierno, dagiti mangidadaulo ti probinsia ti Ilocos Sur ken amin nga adda pakaseknanna iti daytoy black sand mining.”

Kabayatanna, kinuna ni Gov. Luis “Chavit” Singson nga awan ti objectionna iti panagrali dagiti papadi ken dadduma pay a grupo ta adda demokrasia iti probinsia.

Nupay kasta, pinasagidanna dagiti dadduma a papadi ta saan a ti pudno ti ibagada.

Kinuna ti gobernador nga awan ti maisaysayangkat a black sand mining kadagiti lugar a madi dagiti agindeg.

Inlawlawag ti gobernador nga adda proseso ti panagminas, umuna ti panangaprobar dagiti lumugar ken maseknan nga ahensia ti gobierno no kayatda.

Innayon ni Singson a naipalubos ti panagminas kadagiti lugar a di kimmontra dagiti agindeg idinto nga inyunay-unayna nga adda met dagiti pagimbagan  a maipaay dagiti agminas kas iti pannakaipasdek dagiti inprastruktura iti lugar.

Inkalintegan ni Singson a saan a black sand mining ti nakagapu iti pannakakurkor dagiti coastal barangays no di ti climate change.

“Adda dagiti lugar nga awan ti black sand mining ngem nakurokoran latta met ti igid ti baybayda,” kinuna ti gobernador.

Kinuna pay ni Singson nga awan ti kinapudnona ti alegasion a dagiti laeng opisial ti probinsia ti agimbag iti black sand mining.

“No batuendakami iti bato, batuenmi ida iti tinapay,” kinuna ti gobernador.

Mainaig iti pammabalaw dagiti papadi a kaadda ti dinastia politikal iti probinsia, insungbat ti gobernador:  “mayatak, basta la ketdi adda ti linteg… surotek.” (Karaman ti report ni Danny Antalan)