Footer

3 mangngalap, nagkatangkatang iti taaw iti Aldaw ti Puso

SANTIAGO, Ilocos Sur –  Imbes nga iti denna dagiti patpatgenda ti nangpalabasanda iti Aldaw ti Puso, nagkatangkatang ketdi dagiti tallo a mangngalap iti taaw iti daytoy nga aldaw.

Sa la nakasangpet dagiti mangngalap a nabigbig a da Rodolfo Estrata, Ruben Collo ken Judel Escalona, agpapada a residente iti Barangay Gabao ditoy nga ili idi malem ti Pebrero 15.

Segun iti maysa kadagiti biktima, timmapogda iti baybay iti alas sais ti bigat ti Pebrero 14 ngem naikkat ti turnilio ti palig-palig ti bilogda a nakaigapuan ti panagkatangkatangda iti taaw.

Pinalabasda ti rabii iti taaw ket segun ti maysa kadagiti naitawtaw, dandani dinalapus ti maysa a barko ti bilogda.

Nasapulan dagiti tallo a mangngalap nga agkatangkatang iti taaw babaen kadagiti kalugaranda a timmapog iti baybay a mangsapul kadakuada idi agarup alas dos ti malem ti Pebrero 15.#