Footer

Arigengen iti Warnakan

Ni  Jaime M. Agpalo, Jr

(Umuna a paset)

 

Nagpartak nga agtulid ti panawen kadagitoy nga aldaw ti digital era, mangrugrugika pay laeng nga agtignay a mangraman iti naipuni, sabali manen a putahe ti maidiaya; ket no dadduma, saanmo a masurotan, talaga a maikapiska wenno maibatika iti biahe a kunada no awananka iti ammo, agkurang ti awitmo wenno pagpidutam iti impormasion ken dadduma pay.

Addatayon iti digital era ta dandani  inukoparan aminen ti electronic process. Naksayan ti audiens dagiti babasaen a naisurat iti papel; adu pay ketdin dagiti dadakkel a publikasion ti simrek iti digital ken/wenno addaan iti digital bersion kas ti Tawid News Magasin; dagiti dadduma, inibbatandan ti agiprinta tapno makamenosda iti production cost; ta no amirisen, bimmassit ti bilang ti target nga  audience ti naiprinta a babasaen ta ad-addan nga agsadag ti agdama a henerasion kadagiti damdamag ken impormasion babaen ti internet.

Ngarud itoy kabarbaro nga era, kabarbaro met ti paggapuan ti resources ket sumakaytayo iti dalluyon ti panagbalbaliw.

Awit dagiti simrek iti digital a proseso—intugotda dagiti advertisers ken sponsors a pangalaan iti income ket  dakdakkel a bentahe iti masanguanan nga aldaw nga umadu nga umadu ti maawis agsipud ta dagiti naub-ubing nga henerasion ket ad-addan nga agsadag kadagiti impormasion a maadaw babaen ti internet.

Isu a saan a maliklikan ti mangrikna ken dumlaw iti arigengen ti panagiprinta, lalo ta adu dagiti factor a mangitagtag-ay kadagiti posibilidad a  panagkupin ken pannakaidulin ti warnakan. Nasken a sanguen ken kumpasan ti kinapudno ta dayta ti ayug ti panawen.

Kasla pinanawanen ti panawen ti awanan iti digital a bersion. Isu nga addaan metten iti digital a bersion ti kaaduan kadagiti pagiwarnak ken magasin; lalo ket adda met  libre a pagaramidan iti kabukbukodan a website wenno iseksek met ti kayat nga ipadamag kadagiti nagduduma a networking site ken blog.

Dagiti nadakamat iti ngato ti sumagmamano a rason no apay a naksayan ti ilgat dagiti naisurat iti papel a babasaen—dagiti magasin, pagiwarnak, newsletter ken dadduma pay. Maitutop ngarud a sanguen ken awaten ti panagbalbaliw a kas anges ti sumsumiag a panawen.

Nataenganen ti audiens, ket dagiti dadduma, immunadan sadiay nagkaysa a biag wenno addadan a makiay-ayam ken ni Abraham. Naksayan ngarud ti bilangda, saanen a maisubli ti panawen a naglabas — kas idi panawen a tunggal agsapa a padaanan ti agisursursor iti pagiwarnak ken magasin a pangagsawan iti impormasion a mangited iti taraon ti panunot ken mangmuli ti nabanbaneg a masakbayan. Sabalin ita a panawen. No ibasar iti demographics, saan nga agbayag wenno agnanayon dagiti patron wenno supporters ta adu met kadakuada ti dumatag sadi langit.

Saan met ngarud nga agtultuloy ti sirkolo no di ket maksayan ta sabali metten ti wagas a kayat dagiti sumarsaruno a henerasion—ket saanen ti rason a dagiti nataengan ti target audience ta iti panagtulid iti panawen, adu ti simrek iti digital audience.

Saan a namnamaen ti dakkel nga ilgat dagiti ubbing ken agtutubo ita a panawen ta manmanon kadakuada ti gumatang iti basaenda. Umuna pay a sanguenda ti naggian wenno load ti selponda, iPhone, iPad, tablet, load ti router a paginternet ken dadduma pay nga inda iyun-una a sanguen ken paggastosan. Saanen a praktikal nga aramid ti gumatang iti uray maysa laeng wenno dua a pagiwarnak ta ad-adu pay ti maagsawda a kasapulan iti inda panagaramat iti internet.

(Adda tuloyna)