Footer

Ayan-ayat a di Inumag ti Panawen

Sarita ni Danilo S. de Guzman

Maikatlo a paset

 

Napateg kano unay kenkuana ti kuentas. Kanayon a suotna daytoy. Ngem iti panagjoggingna itay bigat, inkabilna iti walletna. Mabalin a naregregna ti wallet a dina napupuotan idi madama nga ag-stretching iti Burnham Park. Nakaawiden iti balay ti kabsatna iti maysa a subdivision sadiay Camp 7 idi nadlawna a mapukpukaw ti walletna. Binirokna ngem napaay. Insiwet ti panangpatarayna ti kotsena a nagturong iti Burnham Park ket sinukimatna amin a nagnagnaanna ngem napaay a nangsapul. Dina payen masursurotan ti aramidenna.

Inruarna amin a linaon a kuarta ti wallet ket inyawatna kaniak. Kukuak kanon ta naisublin kenkuana ti kapatgan iti amin kenkuana—ti kuentas.

Napaisemak, ket iti mugingko, makitkitak da papang ken mamang a nakatakder nga umis-isem. “I’m sorry, Sir, saanko a maawat dayta. Pakaragsakak met unay ti pannakakitak kadakayo a maragsakan la unay iti pannakaisubli ti walletyo.”

Pinerrengnak. Mata iti mata. Agbalbalikas dagiti matana. Ngem saanak man la a nagkirem a nakiperreng. Impilitna latta ti kuarta ta kas gunggonak kano. Ngem nabatad dagiti pammagbaga dagiti dadakkelko iti mugingko a saanak nga agpabayad iti aniaman a tulong a maipaayko. Ta saan kanon a tulong no agpabayadak. Isu a pinagkedkedak manen ti diayana.

Pinayapayanna ti waiter. Nagorder iti kape ken chicken sandwich. Idi dinamagna no ania ti orderko, ti orderna lattan ti imbagak, yantangay managkapeak met ken tagiimasek ti chicken sandwich daytoy a restaurant ta masansan a dumagaskami nga aggagayyem no dadduma.

Napateg kano unay kenkuana ti kuentas. Pakalaglagipanna ken ni Carmen Sandoval—ti kaayan-ayatna pay laeng idi agtawen iti sangapulo ket walo. Naginnaddayoda ta saan nga umayon dagiti dadakkelna iti ayan-ayatda. Inlabanda ti ayan-ayatda ngem napinget dagiti dadakkelna. Indiayaanda pay iti dakkel a gatad ti kuarta ni Carmen tapno adaywanna laeng ngem saan nga inawat daytoy. Pinagsawsawanda pay iti agkakadakes ti ipatpategna unay.

Binabalaw ni Mr. Barnacha ti inaramid dagiti dadakkelna, ngem lalo pay a naglak-am iti unget. Iti sumaruno nga aldaw, saannan a nakita pay ni Carmen, saannan nga ammo no sadino ti ayanna. Awan ti makaibaga iti asinoman a nagdamdamaganna.

Nasaktan unay unay. Gapu iti nasaem unay a linak-amna iti nagan ni ayat, saanen a nagayat pay iti sabali. Imbukbokna ti amin a panawenna iti panagiskuelana agingga a nakaturpos iti kinainhiniero. Nakapagtrabaho iti gobierno—iti DPWH, ngem saanen a nagasawa ta maymaysa kano laeng ti ayatna, ni Carmen Sandoval.

Naglabas ti tawen agingga a nagretiro, duan a tawen ti napalabas. Isu nga adda iti Baguio ta asikasuenna dagiti impatakderna a negosio ditoy.

Napamulagatak pay, kudkodek koma ti saan met a nagatel a tuktokko ngem nagteppelak ta lumaksiden dayta iti good manners and right conduct ta amangan no masukitko ti rikna ti kasasaok, isu a nagparbengak. Minulmolak lattan iti mugingko ti saludsod.

Idi pay la tinedier ti kunkunana a kaayan-ayatna? Nagretiro payen iti trabahona ngem dina pay la nalipatan ti babai? Anian, naidumduma nga ayat ta saan nga inumag ti panawen! Iti las-ud ti kabayagnan, saan a malipatan daytoy a lakay ti nagpukaw a kaayan-ayatna? Manmano ngatan ti kastoy a pakasaritaan ni ayat; no maminsan, talaga nga adda dagiti karkarna a pasamak iti sirok ti init a kas iti ayat ni Mr. Barnacha—ti ayat a mamagtayyek ti lubong.

Ngem iti panagkitak ken ni Mr. Barnacha kasla ub-ubing ngem ti edadna. Naisem dagiti matana idi imbagak dayta kenkuana. Kasla agedad iti limapulo.

Sinaludsodna met no ania ti aramidko iti agdama. Imbagak a kagredgreduarko iti kursok a business management, nga adun iti nagaplayak ngem saan pay la a dimteng ti gasat a makasapul.

Nadlawko a kasla nagpanunot iti nauneg ni Mr. Nicolas Barnacha wenno Tata Nick, a kas iti imbagana a pangawagko kenkuana.

(Adda tuloyna)

Comments are closed.