Footer

Dagiti Karkarna A Damdamag

Salaysay ni Melvin F. Bandonil

(Maudi iti dua a paset)

 

Iti sangalubongan, ti laeng Belgium ken Holland ti addaan iti kastoy a linteg—ikonsidera daytoy a linteg ti panangipaay iti euthanasia wenno pannakapapatay babaen ti lethal injection tapno agpatinggan ti panagrigrigat ti asinoman gapu iti nakaro unay a sakit, kas iti kaso dagiti singin. Segun ti Het Laatste Nieuws newspaper, addan 1,133 a naipaayan iti euthanasia idi 2011. Kaaduanna dagiti nagkiddaw itoy ket dagiti addaan iti nakain-inaka a sakit a saanen a maagasan.

Iti Europa, ti Belgium, Luxembourg ken the Netherlands ti addaan linteg nga euthanasia; sadiay Switzerland mapalubosanda a mangaramid ti bersionda nga assisted suicide. Iti USA, dagiti laeng estado ti Oregon, Washington ken Montana ti mangipalubos iti assisted suicide. Sadiay estado ti Michigan idi 1990-1998, inaramid ni Dr. Jack Kevorkian ti assisted suicide kadagiti 130 a katao, nasukalan ti aramidna, naidarum ket nasentensiaan iti 10-25 a tawen pannakaibalud iti kaso a second-degree homicide.

No adda second-degree homicide, adda kadi met first-degree homicide wenno third-degree homicide? Euthanasia ken assisted suicide, saan kadi agpadpada? Saan ngata ta dayta naudi ket maysa a tayutay a metonymy idinto a dayta umun-una ket scientific terminology. Ti tayutay a metonymy ket panangaramat iti sabali a balikas a sandi ti nadagsen-makasugkar a denggen a balikas. Iti ababa a pannao, pinapintasmo laeng ti nalaad, hmn…

Sadiay manen USA, makapamulagat ti damag (uray dakami) itay nabiit a panagsinan dagiti agassawa a nagam-ammo iti Facebook idi 2008 sada nagkallaysa idi 2009. Piman met ti nagbanagan ti ayan-ayatda ta nagtungpal laeng iti diborsio.

Ania?  Ania ti kunam? Saan a karkarna a damag ta gagangay laeng ti diborsio!

Saan a dayta diborsio ti karkarna a damag no di ket dagiti agassawa ta agpadada iti nagan ken agkaapeliedoda pay! Wen, nagdiborsion da Kelly Katrina Hildebrandt, edad duapulo ken ni Kelly Carl Hildebrandt, agtawen  iti duapulo ket uppat. Iti panagasawa dagiti agkanagnagan ken agkaapeliedo idi 2009, nagbalinda pay nga instant celebrity, nai-feature kadagiti magazine ken iti telebision. Ngem, ania pay ita, nagultimo met laeng iti diborsio ta saan nga umanay dayta  panagkanagnagan ken panagkaapeliedoda a nangsalbar ti kallaysada. Hmn, biag…!

Sadiay met Aringay, La Union, iti maikadua a lawas ti Enero daytoy met la a tawen a napasamak ti karkarna—makapaisem-makapamisuot a damag. Diak ammo no umisemka wenno agmisuotka a makadamag daytoy. Napan inwayway ni Ryan Pineda, edad 29 ti bakana iti kataltalonan. Gagangay iti probinsia, pasaray agpatpatnag dagiti dinguen iti nakaiwaywayanda, a kasta ngarud ti napasamak. Gagangay a mamutittit dagiti ayup a maiwayway nga agpatpatnag.

Kabigatanna, napan sinarungkaran ni Ryan ti bakana, ngem saanna metten a makita ti ayup. Idi usisaenna a nalaing ti nakaiwaywayan ti bakana, nasarakanna ti ulo, lalat ken saksaka ti baka! Anian, nangibatida pay laeng, dida pay la innala amin ta mapnekdan; ngem adda met nagkuna a nangibati a, dagiti mannibrong iti pangramanan met ti makintaraken, narigat met no isuda laeng a mannanakaw ti mabsog.  Sus, makapaisem-makapamisuot a damag!

Dagiti karkarna, di nakapappapati ngem pudno a damag ket paset iti inaldaw a panangsagang, panangpalabas kadagiti nagduduma a damdamag iti sangalubongan.#