Footer

Pondo para soil fertility mapping iti Cabugao, nanayonan

CABUGAO, Ilocos Sur – Dinayaw ni Bureau of Soils and Water Management (BSWM) Assistant Director Wilfredo E. Cabezon ni Mayor Edgar S. Cobangbang, Jr. gapu iti panangnayonna iti pondo para iti soil fertility mapping ditoy nga ili nupay adda inrekomenda ti opisinana a basbassit a pondo para iti daytoy a gannuat.

Kas rekomendasion ni Cabezon, napunduan ti nasao a gannuat iti P400,000.00 ngem ninayonan ni Cobangbang tapno mapagbalin a P1 milion para iti naan-anay a panagballigina.

Babaen ti soil fertility mapping, maamiris dagiti daga ditoy nga ili tapno maammuan ti maiyannatop a ganagan a mausar ken dagiti kangrunaan a maimula tapno dakdakkel ti maapit dagiti mannalon.

Segun ken ni Cabezon, teknikal a tulong ti aggapu iti opisinana idinto nga ibaklay ti lokal a gobierno ditoy ti magastos iti pannakaisayangkat ti nasao a gannuat.

Kinuna ni Cobangbang a rumbeng laeng a maikkan iti naan-anay a pondo daytoy a programa a mangpadur-as iti panagbiag dagiti mannalon.

Ti soil fertility mapping ti BSWM ti kaunaan a programa a maiwayat iti probinsia.#

Comments are closed.