Footer

Ayan-ayat a di Inumag ti Panawen

Sarita ni Danilo S. de Guzman

(Maudi a paset)

 

 

 

Nagawidak a dagus kalpasan ti panagsinami ken ni Tata Charlie.  Asidegakon iti balaymi, maysa laengen a bloke idi naimatangak manen ni Nanay Chayong, ti katulong ti kaarrubami, a makumikom nga agsibsibog iti paraanganda a namulaan iti nagduduma a masmasetas ken tallo a plot ti petsay.

Sipud pay addan puotko ket agpapaayen a katulong iti pamilia Fernando. Nagaget ti baket, nakaranting nga agtigtignay, ket dayta met ngata ti rason a saan a panangibilang dagiti pagpapaayanna a kas katulong. Nanay Chayong ti awag kenkuana dagiti uppat nga annak da Tata Carlos ken Nana Rizalina a madama a nakabakasion sadiay US ta  sadiay nga agnanaed ti pamilia ni Manong Clifford nga inaunaan nga anakda.   Sadiay London nga agtrabaho ni Manang Carina a nurse; mangisursuro met iti kolehio ni Manang Claire ken agis-iskuela pay laeng iti abogasia ni Manong Brandon. Taltalloda nga agnanaed ita iti bunggalo a balay.

Nalawag ti pasado alas onsen nga oras segun ti nataldiapak iti kanigid a pungnguapungnguak, awan milatna ti tangatang ken saan nga agpulsot ti kuldit ti puyupoy. Makitak pay laeng ti netbook a nakaparabaw iti monoblock a tugaw ngem naulimeken.

Naipigket dagiti matak iti agtiltillayon iti barukong ni Nanay Chayong, madama itan nga agkurkur-it kadagiti masetas iti asideg ti ruanganda isu a naimatangak: nakabestida iti sabongsabongan a de rosas,  agtayag ngata iti lima a kadapan ken lima a pulgada, ken madlaw ti sallapiding iti ngatuen ti makannigid a kurimatmatna, maratimmukelen ti naamo a rupa, nakaranting nga agtigtignay ken diak pay nakita a nalidem ti rupana.

Adda ti nutnutnotan ti panunotko ngem saanko a magaw-at ti sungbat.Saanko a mapagsasaip dagiti pasamak no siak laeng ti mangibuksil. Apaman a nakasangpetak iti balaymi, dinamagko a dagus ken ni Mamang no ania ti pudpudno a nagan ni Nanay Chayong. Imbagana met. Imbagak ti linaon ti panunotko, ket impatigmaan ni mamang nga awagak manen ni Mr. Barnacha.

Dinagusko nga inruar ti selponko.

“Tata Nick, sir…? Pasensiakayon no nakaisturboak,” imbagak no apay nga immawagak.Indetaliek ti amin.

Iti gagarna, imbagana no sadinonak a masarakan ta isun ti umay. Imbagak ti subdivision nga ayanmi nga adda iti laud-nga-amianan ti Baguio City, nalaka laeng a masarakan ti balaymi ta sumagmamano laeng a bloke kalpasan iti entrance gate, ken makita met ti numero ti balaymi a nagpinta iti puraw.

Agarup nasurok ngata a kagudua nga oras idi adda agbusina iti sanguanan ti balay.Dinagusko iti rimmuar. Ni Tata Nicolas a nakatakder nga umis-isem. Pinastrekko iti inaladan ket inyam-ammok kada papang ken mamang iti salasmi.

Nagpakadaak kadakuada nga agsasarita ta adda laeng siripek biit iti ruar. Iti bangir nga inaladan, mangmangngegko manen ti musika a paborito ni Nanay Chayong:

They couldn’t take you away from me/ ‘Cause I’ll take your love with me/ Promise me that you will be/ True to me eternally…

Nagsubliak iti uneg a sigagagar. Inayabak ni Tata Nick ket immallatiwkami iti bangir nga inaladan—nga iti dayta a gundaway ket madama nga agur-urnos ni Nanay Chayong kadagiti masmasetas ken nakasamsam-it ti inna panagdayyeng a mangsursurot iti paboritona a kanta iti yuotube, kunam la no maragragsakan unay. Inulitna manen ti kanta.

Ngem kasla nakigtot iti pannakakitana kadakami ken Tata Nick.

Pinaliiwko ni Nanay Chayong kasta met ni Tata Nick a dida makauni, basta lattan agpinpinnerrengda. Suot ni Nanay Chayong ti kuentas nga addaan iti bassit a bitin a sinanpuso, kasta met ti suot ni Tata Nick a kuentas—ti naikabil iti walletna idi napidutko. Napaisemak ta agpada dagiti kuentasda! Dimteng ti konklusion iti mugingko a dagita a kuentas nga addaan ti bitinna a bassit ngem daplat a sinanpuso ket singin ken isu ti tanda ti ayan-ayatda—ayan-ayatda idi pay laeng tinedierda—ayan-ayat a di inumag ti panawen.

Siakon ti nagtimek idi diak mauray ti panagsaoda ta basta lattan agpinpinnerrengda.Iti panangiyam-ammok tunggal maysa, awan latta ti agtimek wenno mangiyawat ti dakulapna a makipasamano. Pagammuan, awan ti sintimek dagiti dua, kellaat a naginnarakupda—nairut nga innarakup; mangngegko pay ti nakapsut a saibbek ni Nana Chayong.

Nagin-inayadak a pimmanaw; inisemak ti paborito a musika ni Nanay Chayong manipud iti netbook:

My pledge of love cannot be broken/ And I believe it’s there with you forever/ If I must die to lose the love you gave/ Again I’ll come to life and pledge my loveagain…

KALPASAN ti makalawas, napanak manen nagbirok iti trabaho, ta makapasikor met ti awan obraenna, ngem no kasano iti gagar kasta met iti idadateng ni pannakapaay. Idi aggawidak, nasangpetak da Nanay Chayong ken ni Tata Nick iti salas, kasasaoda da papang ken mamang.

Ni Nanay Chayong ti kaayan-ayat ni Tata Nick idi tinedierda. Tindera iti maysa a tiangge ni Nanay Chayong ket saan a nagustuan dagiti istrikto a dadakkel ni Tata Nick. Simmang-at iti Baguio ni Nanay Chayong ket saanen a nagayat pay iti sabali.

Isu nga addada ita ta agaw-awisdan iti inda panagkallaysa, uray no baket ken lakaydan. Ket siak iti napilida a best man ni Tata Nick ken dagiti met dadakkelko ti maysa kadagiti principal sponsor iti kallaysada sadiay Baguio Cathedral. Ngem adda simmangbay a dakkel a barikawwet iti tuktokko ta ti reception ket naangay sadiay Camp John Hay.

Lima pay nga aldaw ti napalabas idi masangailik manen da Tata Nick ken Nanay Chayong. Imbagada a panggepda ti agpasiar iti ballasiw taaw ket medio mabayaganda bassit. Kuna ni Tata Nick a siak iti agbalin a kontakna iti mapaspasamak kadagiti dua a restaurantna ditoy Baguio—maysa iti SM ken iti Camp John Hay—ti nakaangayan ti reception ti kallaysada. Sursuruek kano a nalaing no kasano ti agmaneds ta adda puesto nga agur-uray kaniak kadagiti negosiona.

Idi taliawek da papang ken mamang, nakarabrabuy ti isemda!#

Comments are closed.