Footer

BANNER NEWS: P56-M pategna nga illegal a droga, pinuoran ti PDEA, PRO1

CAMP BGEN OSCAR M FLORENDO – Agdagup iti P56 milion ti pateg dagiti maiparparit a droga a pinuoran dagiti opisial ti Philippine Drug Enforcement Agency ken ti Police Regional Officer 1 ditoy idi Pebrero 20.

Kinuna ni Police Chief Supt. Ricardo C. Marquez, PRO1 director, nga agdagup iti 495,490 dagiti nagduduma pedaso a marihuana ken 195,396.24 grams a shabu ti pinuoranda iti seremonia a naaramid ditoy ken tinabunuan ni Undersecretary Arturo G. Cacdac, Jr., director general ti PDEA.

Kinuna ni Marquez nga ipamatmat daytoy nga aktibidad ti nasinged a panagtitipkel ti PRO1, PDEA Regional Office 1, ken dagiti lokal a government units iti panangpugipogda iti illegal a droga iti lugar a responsibilidadda, a mangipatpatulod iti napigsa a mensahe kadagiti adda iti likudan dagitoy maikaniwas nga aramid.

Sinaksian pay dagiti nangangato nga opisial ti PDEA-RO1, PDEA-CAR ken PRO1, dagiti pannakabagi manipud iti AFP, Coast Guard, National Bureau of Investigation-CAR, Department of Justice, BITAG, dadduma a non-governmental organizations, ken lokal nga opisial ti gobierno ti La Union.

Kabayatanna, kinuna ni Cacdad a ti pannakapuor dagiti maiparparit a droga ket panagtungpal kadagiti pagannurotan para iti pannakakustodia ken disposision kadagiti nasamsam a napeggad a droga kas intuding ti Section 21, Article II of Republic Act 9165 wenno ti Comprehensive Dangerous Drugs Act of 2002, ken DDB Regulation No. 1, series of 2002.

Itay nabiit, nagisayangkat dagiti polis ken operatiba ti PDEA kadagiti nagtipon nga operasion a nagtungpal iti naballigi a pannakasamsam dagiti illegal a droga iti Dagupan City, iti tri-boundaries ti Ilocos Sur-Benguet-La Union ken dadduma a paset ti rehion.

Sangapulo ket pito a tattao a pakairamanan ti dua a menor de edad ti inaresto ti nagtitipon a bunggoy ti polis ken PDEA ken Naval Intelligence iti insayangkatda a drug bust iti Pagasa Village iti Bonuan Gueset, Dagupan City.

Nakasamsam dagiti polis kadagiti pakete ti shabu nga agdagsen iti nasurok a 200 grams, nadumaduma ti kalibrena a paltog, balbala, cash, ATM card, selpon ken nadumaduma a drug paraphernalia.

Mapapati a daytoy ti kadakkelan a nakumpiska dagiti polis iti kampaniada kontra droga.#