Footer

Championship game ti Sta. Maria, Santa, naggibus iti walk-out

STA. CRUZ, Ilocos Sur –  Nagtunged iti walk-out ti Game 7 ti championship match ti First Governor Chavit Singson Intertown Basketball Tournament iti nagbaetan dagiti basketbolista ti Sta. Maria ken ti Santa a naangay ditoy nga ili idi Pebrero 17.

Nagwalk-out ti Team Santa iti third quarter ti championship match a mangab-abak ti Team Sta. Maria babaen ti score a 72-60.

Maitudtudo a rason ti panagwalk-out ti Team Santa ti mapapati a narugit a panagay-ayam dagiti umaayam ti Sta. Maria.

Idi saan a nagsubli ti Team Santa iti court kalpasan ti 15 a minutos, naideklara a kampeon ti Team Sta. Maria.

Ni Congressman ti First District Ryan Singson ti nangiyawat iti P100,000.00 a gunggona ken tropeo iti kampeon.

Kanaig daytoy, linagidaw ni Mayor Edgar Florendo ti napasamak a nangrissing iti pammadayaw a naipaay kadagiti basketeers ti ilina iti panagkampeonda iti torneo.

Kinuna ti mayor a nagbalin a nabara unay ti panagaayam dagiti nakisalip iti torneo gapu iti pusta.

Nupay kasta, dinawat ti mayor ti panagmaymaysa dagiti partisipante kalpasan ti torneo.

Iti sabali a bangir, kinuna ni Santa Mayor Jesus “Pupoy” Bueno a propesional ken adda sportsmanship ti Team Santa ngem saanda kayat a madangran ken isakripisio dagiti umaayamda iti narugit nga ay-ayam dagiti players ti kasupangetda a team

Binabalaw pay ni Bueno ti pannakaipalubos ti pinnusta a nangpabara iti panagay-ayam dagiti basketball players.

Kabayatanna, impakaammo ni Estella Shayne Pascua, sports coordinator ti nasao a torneo a maangay iti mabiit ti Battle of Champions iti nagbaetan ti Vigan City ken Sta. Maria.

Ti Vigan City ti kampeon iti basketball tournament nga immuna a naaramid iti umuna a distrito ti probinsia.#