Footer

Construction worker, nasarakan a napaltogan

CABUGAO, Ilocos Sur – Nasarakan a maysan a bangkay ti maysa a construction worker iti kuarto a nagturoganna a mapapati a pinaltogan ti kinainomna iti napalabas a rabii.

Naduktalan idi agarup 9:15 ti bigat ti Pebrero 18 a nakadasay  ni Eugene Castillo, 26, residente iti Sitio Nagrebcan, Barangay Turod ditoy nga ili, nagsagrap iti dunor iti ulo ken makannawan a takiagna ket kangrunaan a suspetsa ni Rey Garcia, 39, naasawaan, ken residente iti nadakamat a lugar, a kinainomda iti napalabas a rabii.

Segun iti report, bayat ti panaggiinom da Castillo, Garcia ken sumagmamano a kaduada, inruar ti suspek ti cal. 22 a paltogna sana inay-ayam a puon ti in-inut a panagpanaw dagiti kinainomna a pakairamanan ti biktima a napan naturog iti maysa a kuarto iti bangbangonenda a balay ti maysa a Ruben Garcia.

Maysa a kaarruba ti nagkuna nga adda nangegna a kanalbuong iti paltog manipud iti mabangbangon a balay.

Nupay kasta, pinaglibakan ti suspek nga adda pannakainaigna iti pammaltog.

Nakarekobre dagiti polis iti dua a buli a mapapati a naggapu iti cal. 22 iti nakapasamakan ti krimen ngem dida nasarakan ti naaramat a paltog.#

Comments are closed.