Footer

EDITORIAL: Panangited iti as-asideg a serbisio kadagiti umili

TUNGGAL bulan ti Pebrero a naituding ti Civil Registration Month.Itoy a tawen 2013, agsadag iti tema a “Civil Registry bringing Public Service Closer to the People.” Panangiyasideg kadagiti umili ti serbisio a panangirehistro kadagiti maiyanak, nagkallaysa, pannakatay ken dadduma pay a serbisio nga itden ti local civil registrar tapno iti masanguanan nga aldaw ket saanda nga agparikut sanguenda a legal  transactions.

Lalo la unay a tamingen ita dagiti local civil registrar ti panangipaay iti serbisio kadagiti agdendenna a kas agassawa wenno live-in partner iti  panagkallaysadan babaen ti  iwaywayatda a libre a mass wedding ceremony kadagiti mayat nga agtarigagay iti pammatalged iti panagdennada.

Iti ngamin sosiedad ti agdama a panawen, adun dagiti agdendenna a kas agassawa,  adu payen dagiti nataengan ken addaanda payen iti anak wenno annak ngem saan a legal ti  panagtiponda a kas agassawa ta saanda pay la ngarud a nagkallaysa. Ti kangrunaan a rason no apay a mapaspasamak daytoy iti gimong ket ti kinaawan ti gastuen dagiti agpartner, isu a nagdennada lattan; dayta kinarigat ti panagbiag ti rason ti pannakatungday ti kallaysa;  dagiti dadduma, ammoda la ngaruden ti kinarigat iti kasasaad iti biag ngem saanda a nakontrol ti bagbagida ket simrekda lattan iti estado a saan a nakasagana.

Gapu ta saan a legal ti panagdennada a kas agassawa, saanda a maaramat ti panagtiponda a kas agassawa kadagiti legal transaction nga inda serken. Iti legal a panagtipon, nalaklaka laeng ti panangala kadagiti serbisio kadagiti amin nga ahensia ti government ken/wenno iti private agencies, kas ti Government Service Insurance System (GSIS), Social Security System (SSS), PhilHealth,  Pag-ibig (Home Mutual Development Fund),  Department of Foreign Affairs, dagiti banko ken dadduma pay.

Tapno mapunas ti nakain-inaka a rason dagiti umili lalo dagiti awanan kabalinan iti biag, rumbeng la unay a mangiwayat iti mass wedding ceremony dagiti local civil registrar tapno maliklikan ti imbierna ken dakkel a paggastosan ti asinoman nga agtarigagay iti libre a serbisio. Ta nagastos met ngamin ti sumango iti panagkallaysa, ta malaksid ti bayadan iti simbaan, isagana a pagsasanguan, ken dadduma pay a pakakumikoman, maipaay aminen dagitoy iti mass wedding  kadagiti mayat a makipartisipar agraman iti pannakaadda kadagiti ninang ken ninong iti panagkallaysa.

Adun a siudad ken ili ti mangipatpatungpal itoy libre a serbisio. Kas sagudayen ti tema itoy a tawen, panangiyasideg ti serbisio ti civil registrar kadagiti amin nga umili.

Namunganay ken nangrugi  ti tinawen a Civil Registry Month babaen ti pammilin idi ni Presidente Corazon C. Aquino, a nangideklara a tunggal Pebrero iti tawen a mapasamak ti Civil Registry Month, ken napatalgedan babaen ti Proclamation 682.#

Comments are closed.