Footer

Motorista nakidinnungpar, DOA iti ospital

NARVACAN, Ilocos Sur – Saan a naiyabot ti biag ti maysa a motorista iti ospital gapu kadagiti grabe a sugatna kalpasan a nakidinnungpar ti motorsiklona iti maysa a sasakayan iti national highway a sakup ti Barangay Sulvec ditoy nga ili idi rabii ti Pebrero 18.

Natayen a naisangpet iti Narvacan District Hospital ni Edmund Sablay Prades, 28, naasawaan, residente iti Barangay San Roque, Santiago kalpasan a nakidinnungpar ti Mio a motorsiklona iti Toyota Land Cruiser a minaneho ni Leopoldo Bernardez, 48, taga-Bangued, Abra idi agarup 9:40 ti rabii ti Pebrero 18.

Iti report manipud iti polis ditoy nga ili, obertekan koma ni Prades ti maysa a trailer truck ket kimmaut iti linia ti agpalaud a Land Cruiser ket nupay nagpreno ti biktima, nadungparna latta ti makasabatna a lugan.

Nakaro ti dadael ti motorsiklo.

Nakakustodia ni Bernardez iti police station iti pannakaisurat daytoy.#