Footer

SINURSURAN: Ti Adal a Yeg dagiti Aksidente

Ni Jobert M. Pacnis

(Umuna iti dua a paset)

 

KADAGITI damdamag, iti man telebision, radio ken pagiwarnak, bumanbandera dagiti aksidente ti lugan a pakairisrissingan ti biag dagiti maseknan.Mapaspasamak dagitoy iti baet dagiti adu a linteg a mangkitkita, mangsalsaluad iti karadkad tunggal motorista ken pasahero, uray payen dagiti bystander a makunkuna.

Kadagiti pamilia dagiti biktima dagitoy a pagteng, mangukrit laeng iti sugat a mangipaay iti nagpaiduma a saem aglalo la unayen no dagiti ipatpategda ket kinettel ti motorista a barumbado iti kalsada. Ta asino met ti di agsakit la unay ti nakemna no ti ipatpateg ket maiddep ti narayray a bituenna gapu laeng kadagiti pasaway?

Ti pay nasakit, adu kadagitoy nga aksidente ti itarayan dagiti akin-aramid. A kasla ketdin maitarayanda ti aramidda iti agnanayon. Ta narigat met ngamin ti matiliw a mangbayad iti bunga ti nagbasolan. Ngarud, no awanen ti nakakita iti aksidente, nakalibren ti suspek.Ngem ketdi, didanto maitarayan ti konsensiada.

Sabali met ketdi a kaso dagiti motorista a naaksidente gapu iti panaglablabesda iti sango ti manibela. Didan pampanunoten ti karadkadda.Bumanesbes ti panagpatarayda uray nakalidokda iti nasanger. Awanen ti makuna a pagpilkoan, nagalis a dalan, agballasiw nga ayup wenno tao, lugan a masabet, ken uray la bato a bassit a mapilidan.

Wen, kaadduan kadagiti aksidente ti lugan ti parnuay dagiti nabartek— a kunaendanto no matiliwda kalpasan ti disgrasia (no didanto pa timmangad iti barsanga, a): nakainomak nga agpayso, sir,  ngem bassit laeng. Diak nabartek.

Ta ania koma ngamin, aya, ti nagdumaan dagita dua? Ania ketdin a panagut-utek!

Iti panirigantayo, agpada laeng dagita nga addan iti ikub ti makaulaw a likido a mamagbaliw iti kababalinda kabayatan ti panagmanehoda.Awanen ti simbeng ti panunotda. Didan ammo ti dakes ken saan. Kunam no isudan ti ari iti kalsada.

Mapalpaliiw a kaadduan kadagitoy nga aksidente ti mapaspasamak iti rabii ti Biernes ken Sabado. Kadagitoy nga aldaw nga adu a gimik ti mapaspasamak aglalo kadagiti nabambannogan iti makalawas a pannanggedda. Ngem sabali met a gimik ti masumokda. Inom agingga a didan kabaelan ti bagida.Naimbag koma no saanda nga agmaneho iti lugan iti panagawidda.Ti adatna, mangiramramanda kadagiti inosente no adda dakes a mapagtengda bayat ti panagmanehoda.

Rumrummuar ngarud a kaadduan kadagitoy a disgrasia ti gapuanan dagiti nakainom iti nasanger.Manmano ti makunkuna a mechanical error wenno mismo ti lugan ti agpalia.Ti drayber ti yan ti diperensia. No di nabartek, puyat wenno nagoberload (kadagiti dadakkel a lugan).

Dadakkel a lugan?Laeng?

Kadagiti ili ditoy Tanap, a mabalin met nga uray kadagiti sabsabali a probinsia, di laeng dadakkel a  lugan ti agob-oberlod. Uray pay dagiti babassit a kas kadagiti motor ken traysikel. Kadawyan daytoy a buya no kasta a panagaawid dagiti agbasa.Kasla agsabong nga alukon dagiti lugan iti kaadu ti pasaheroda. Kinapudno daytoy kadagiti ili nga adda nasulinek a bariona a narigat a papanan ta di pay nasemento. Inayon payen dita a manmano ti lugan a sumrek.Kayatna a sawen, agkurkurang ti lugan a mangitulod kadagiti estudiante iti barangayda.Kaykayatdan ti agbitin ngem ti magmagnada iti pinullo a kilometro. Ken nalaka, aya, ti maamitan iti dalan? No sumipnget, sabali manen a parikut. Adu ti baribar ti kararuana.

Agdua tawenton ti mapalabas. Agsu-substitute-ak iti maysa a pagadalan iti kabangibangmi nga ili idi adda aksidente a nalabsak a nakatayan ti maysa nga estudiante iti pampubliko a pagadalan.

Napigsa ti tudo kadayta a malem a panagaawid dagiti agbasa.Dimo payen masirarat ti masabatmo iti kapigsa ti bayakabak.Naka-headlight amin a masabat.Iti speedometer-ko, mapan laeng a 30kph ti tartarayek.Ngem nupay kasta ti situasion, kas iti dati, agsabsabong latta a kasla alukon dagiti traysikel nga agbiahe iti adayo iti sentro. Ti pay dakesna, di naksayan ti kinapeggesda. Innuna iti kawatiwatan ti dalan.

Maysa laeng ti panagkamali a kunada. Iti panagoberteyk ti maysa a center car (traysikel a maratiddog), nasagudna ti unaanna koma (a napnapno met iti estudiante) iti panagpaigidna  ta adda gayam masabatna. Iti kinagalis ti dalan, di unayen kimpet ti preno.Nagtayyek ti traysikel ket naipullasit dagiti nakabitin.Naimbag ketdi ta dida nagdiretso iti kataltalonan.Maysa ti dagus a natay nga inakupda idinto a natukkolan dagiti dadduma.

Nadanonak pay laeng ti drayber ti nagoberteyk a traysikel. Kudkod a kudkod.Madandanagan. Dagiti met estudiante a di napakaruan iti uneg, nakamuttalengda lattan. Dida pay napasubli ti karkarmada. Dagiti immarayat a pannakabagi ti linteg, dagiti biktima ti immuna nga inasikasoda kalpasan a naalada ti plaka ti lugan ken ti kinaasino ti drayber.

Nalaka laeng koma met a maliklikan dagitoy nga aksidente no adda laeng disiplina dagiti drayber. Panunotenda koma dagiti pasaheroda.Saan  a dayta kuarta a mabalin a pastrekenda. Wen, adda ditan ti kinangina dagiti paset ti lugan nga agdadael ken ti gasoline a masapul a masubbot. Ket kayatda laeng met ti gumanar. Ngem ti koma salun-at ken karadkad dagiti pasaheroda ti ipangpangrunada—uray payen ti bagbagida.Annad ‘di nalpas nga annad ti kasapulan no di maliklikan ti panagoberlod. Kitaen ti paniempona ken saan a makipinnangas iti dalan.

Nasakit ngamin a kinapudno nga adu dagiti nakaiggem ti manibela ti dina kayat ti maun-unaan. Ta nalaka, aya, ti makantiawan? Itawwekna ketdi met, a, ti pumataray tapno agbalin a bida. Ken di makatkatawaan.

(Adda tuloyna)