Footer

3 armado, kriminal a grupo, naaresto iti kampania ti SAFE 2013

CAMP BGEN OSCAR M FLORENDO –  Tallon a miembro ti partisan armed groups ken criminal groups ken dua a wanted persons ti naaresto manipud itatapog ti Enero daytoy a tawen, daytoy ti impakaammo ti police regional director itay nabiit.

Kinuna ni Police Chief Supt. Ricardo C. Marquez, police regional office 1 director, a maysa a kameng ti PAGs,  2 a miembro ti criminal groups, ken 2 wanted persons ti tiniliw ti Regional Intelligence Division (RID) ken Regional Special Operations Task Group (RSOTG) Ilocos Sur kas paset iti nainget nga isaysayangkat ti kapolisan a Secure and Fair Elections (SAFE) 2013.

Kinuna ni Marquez nga  6 a PAGs members ken 7 a miembro ti CGs ti simmuko, ken agdagupen iti 22 dagiti armas a nakumpiska kadagiti insayangkat ti kapolisan a search warrants, boluntario a naisuko ken iti panagresponde dagiti polis.

Impakaammo pay ni Marquez nga idi Pebrero 21, inaresto dagiti nagtipon nga elemento ti Regional Special Operations Task Group (RSOTG) for Ilocos Sur, CIDT ken PIB Ilocos Sur sadiay Cabugao, Ilocos Sur ni Jofel Reton, mapapati a miembro ti Sinco Group, manipud iti Barangay Turod Patac, Cabugao, Ilocos Sur babaen ti bileg ti search warrant nga inyisio ni Judge Nida Alejandro ti  RTC Branch 20, Vigan City.

Nakumpiska manipud ken ni Reton ti maysa a hand grenade.

Naipilan ti kaso nga illegal a panagikut iti eksplosibo maikontra ken ni Reton.

Kabayatanna, iti daytoy met laeng a petsa, tallo a mapapati a miembro ti Patron Group a pakaibilangan da Dionisio Patron, Ernesto Patron ken Rosendo Pilar ti boluntario a simmuko iti Ilocos Sur PPO babaen ti tulong ni Bantay Vice Mayor Floro Peredo.

Karaman nga insuko ti grupo ti maysa a  homemade 12 gauge shotgun, homemade caliber .22 revolver ken homemade pistolized 7.62.

Kinuna ni Police Supt. Sterling Raymund P. Blanco, hepe ti RID, a nupay simmuko dagiti miembro ti Patron Group, nainget latta a monitoren ti RSOTG Ilocos Sur ken RID ti nasao a grupo.#