Footer

MANNUROT: Panaglusulos ti Santo Papa, panangtallikud iti pagrebbenganna?

Kolum ni Danny Antalan

(Maudi iti dua a paset)

 

Ibagbagada a kas koma ken ni Pope John Paul II nga agingga iti sibibiag, uray payen nakaratayen, nagtalinaed kaniana dagiti regalia.  Ta apay?  Agsipud ta iti dayta a responsibilidad, dimo mabalin bumaba iti krus.  Agsipud ta isuna ket saanen nga ordinario a tao no di ket maysa a vicar ni Hesu-Kristo.  Kas maysa a Papa, masapul nga ibaklayna dayta a krus agingga a sibibiag isuna.  Agingga nga adda anges iti barukongna.

Isuna ti duri ti Katoliko.  Ket no maikkat dayta a duri, pakapsutenna ti bagi.  Kasano laengen ti simbaan iti ipapanawna?  Di ket ngarud ngata maapektaran ti pammati ti kongregasion no ti namnamaenda a mangpatibker kadakuada ket isuna met ti nangipakita iti kinalupoy wenno panagsanud kadagiti pannubok iti biag a sumangbay?  Pudno met, ta maysa a pannubok ti panaglupos iti bagi ti pigsa ken salun-at.  Isu ngarud  nga agarup 600 a tawen ti limmabas nga awan ti naglusulos a Santo Papa ta ngamin saan a maysa a trabaho daytoy.  Maysa daytoy nga akem ken debosion a nairamenen iti dara ken kararua.

Iti pettat a panaglusulosna, masapul ngarud a mangkita iti mangsukat kaniana.  Ti mapili a tugot ni San Pedro a mangidaulo iti simbaan a marirriribuk kadagiti kontrobersia ti child abuse, panagkasar kadagiti agpada ti kinatao, ken panangbirok iti umno a lohika ken sungbat iti panagaramat iti paglapped iti panagsikog.

Dagitoy dagiti maaw-awagan iti Papabili wenno posible nga agbalin a Santo Papa.

Ket naggasat ti Pilipinas ta maysa a Filipino ti agallangogan ti naganna.  Ni Cardinal Luis Antonio Tagle.  Ni Cardinal Tagle ket itay laeng tawen 2012 a nagbalin kas maysa a cardinal.  Agtawen laeng iti 55, kaubingan kadagiti papabili ti Vatican.  Ngem gapu iti karismana nga ibagbagada a kas ti nakitada iti kasikatan a Santo Papa a ni Pope John Paul II, isuna ti posible a mangsukat.  Asideg ken ni Pope Benedict ken nagdennada iti International Theological Commission.

Ni Joao Braz de Aviz iti Brazil ket agtawen met iti 65.  Idi napan idiay Vatican idi 2011, imbagada a nangipaay iti bang-ar iti kongregasion.  Ipatpategna dagiti marigrigat idiay Latin Amerika kagiddan iti panangadalna dagiti napintas a banbanag kadakuada.

Ni Timothy Dolan iti United States of America ket agtawen iti 62.  Nagbalin nga arsobispo iti New York idi 2009 ken nagbalin a boses ti katolisismo ti Amerika.  Ti kinaalibtak ken pannakilangenlangen ti nakaguyugoyan kenkuana ti Vatican.

Ni Mark Ouellet ti Canada ket 68 anios.  Epektibo a nangidaulo iti Congregation for Bishops iti Vatican.   Konektado iti Curia ti simbaan.  Isu ti nagkuna iti naminsan a maysa a batibat ti panagbalin a Papa.

Ni Angelo Scola ti Italia, 71 anios ken arsobispo ti Milan.  Isuna ti idurduron dagiti Italiano ken namnamaenda a mangabak iti Papacy.  Eksperto iti bioethics ken adda ammona iti Islam kas maysa a lider iti panangilungalong iti panagkinnaawatan ti Kristiano ken Muslim.

Ni Gianfranco Ravasi ti Italia met laeng, agtawen iti 70, nagbalinen a Vatican culture minister manipud pay idi 2007.  Mangibagbagi iti simbaan iti biang ti arte, siensia, kultura ken uray kadagiti atheists.

Ni Leonardo Sandri iti Argentina, 69.  Ig-iggamanna ti maikatlo a kangatuan a posision iti Vatican kas chief of staff idi 2000-2007.

Ni Odilo Pedro Schere iti Brazil, 63 ti tawenna. Isuna ti kapigsaan a kandidato ti Latin America.  Arsobispo ti Sao Paolo, ti kadakkelan a diosis iti pagilian a kadakkelan ti bilang ti Katoliko.

Ni Christopher Schoenborn iti Austria ket maysa kadagiti sigud nga estudiante ni Pope Benedict.  Agtawen iti 67 ken arsobispo ti Vienna.

Ni Peter Turkson, iti Ghana, agtawen ti 64.  Kapigsaan a kandidato ti Aprika.  Mangidadaulo iti Vatican justice and peace bureau, pannakangiwat ti simbaan mainaig iti social conscience.

Isuda dagiti nagan kas Papabili.  Ngem posible a manayonan pay dagita a bilang wenno mabaliwan agsipud ta ti panagpilida ket saan a kas panagbotostayo iti panawen ti eleksion.  Mabalin a naganda ti maisurat iti panagpili dagiti cardinals ngem mabalin a saan a nadakamat a nagan iti ngato.

Santo la maammuan ti kabarbaro a Santo Papa no rimmuaren ti puraw nga asuk iti Vatican.  Bulan ti Marso ti namnamaen a pannakaammo no sino dayta.

Hmmm, anianto ngata met a nagan ti  kayat ti kabarbaronto a Santo Papa a maipanagan kenkuana ti John Paul ken Benedict?#

Comments are closed.