Footer

Negosiante, biktima ti panangallilaw

CANDON CITY – Maysa a negosiante ti nagbalin a biktima iti panangallilaw nga insayangkat ti nagpammarang nga aglaklako iti diesel gas itay nabiit.

Nainaganan ti biktima a ni Biernes Layo, residente iti Barangay Sapang, Galimuyod, Ilocos Sur ngem saan a nabigbig ti lalaki a nangloko kenkuana.

Segun iti report, inarkila ti suspek, mapattapatta nga agtawen iti 50, ni Leo Solen, 30, agpaspasada iti traysikel, ken residente iti Galimuyod, tapno agbirokda iti pangilakuanna iti diesel gas.

Inturong ni Solen ti suspek ken ni Layo ket kimmuyog daytoy iti panagsublida iti tiendaan ditoy siudad para iti panagginnatangda.

Bimmaba ti suspek apaman a nakadanonda iti tiendaan ket imbagana a mapanna alaen ti resibo iti kaduana. Nabati a naguray ni Layo ta napan metten nagpasada ni Solen.

Nagsubli ti suspek  ket imbagana nga intednan ti diesel gas ken ni Solen agraman ti resibo sana dinawat ti bayad ti gas nga agdagup iti P12,000.00 a dagus met nga inyawat ni Layo.

Idi nakapanaw ti suspek, nagtext ni Layo ken ni Solen tapno beripikaranna no adda kenkuana ti resibo ken ti ginatangna a gas.

Insungbat ni Solen nga awan ti nait-ited kenkuana.

Nagpulong dagiti dua iti polis ngem didan nasapulan ti suspek.#

Comments are closed.