Footer

NEWS FEATURE: COC ti kandidato para mayor ti Cabugao, kinansela ti Comelec

Ni Tatang Lakay

(Tuloyna)

 

Iti daytoy a kaso, kinuna ti Comelec a saan nga inaturgar ti respondente wenno nangipresenta a tinallikudanna ti pannakipagilina kas Amerikana tapno makakualipika para iti puesto ti kinamayor ti Cabugao iti masungad a 2013 midterm elections.

Kinuna pay ti Comelec a “nupay tinungpalna (respondente) ti kasapulan a panagsapata iti Republika ti Pilipinas, saan a nangiwayat iti personal ken nasapataan a panangtallikud iti aniaman ken amin a ganggannaet a pannakipagili iti sanguanan ti maysa a public officer nga otorisado nga agminister iti panagsapata iti paniempo nga impilana ti sertipiko ti kandidaturana idi Nobiembre 5, 2012.”

Kinuna ti Comelec a saan a makaanay ti oath of allegiance nga inaramid ti  respondente idi Hunio 23, 2004 ken ti affidavit of renunciation nga inaramidna idi Marso 23, 2007 idi impilana ti sertipiko ti kandidaturana para iti eleksion idi 2007 tapno matungpalna ti RA No. 9225 para iti panggep ti eleksion iti Mayo 13, 2013.

“This, we cannot subscribe. To do otherwise would render inutile the condition set forth in Section 5 (2), supra….” innayon ti Comelec.

Kinuna ti Comelec a nalawag ti lengguahe ti Section 5(2): saan a makapagtaray ti maysa Filipino American wenno asinoman a dual citizen iti aniaman a mabutosan a pampubliko a puesto iti Pilipinas no saan a personal a sapataanna ti panangtallikudna iti amin a ganggannaet a pannakipagilina iti tiempo a panagpilana iti sertipiko ti kandidaturana.

Kasta met a tapno balido ti renunsiasion, kasapulan a masapataan ti apidabit iti sanguanan ti maysa nga opisial ti linteg nga otorisado a mang-administer iti panagsapata  a maibatad iti nalawag ken di mapagduaduaan a termino a tallikudan ti agpirma amin a ganggannaet a pannakipagilina., inyunay-unay ti poll body.

Kinuna pay ti Comelec nga agdadata ketdi dagiti simmaruno a pagteng no sadino nga inaramat ti respondente ti US a pasaportena iti amin a ganggannaet a panagbiahena manipud Hulio 4, 2007 agingga iti Disiembre 6, 2012.

Dinakamat ti Comelec nga inaramat ti respondente iti 35 a beses ti US passportna iti panagbiahena iti sabali a pagilian manipud Agosto 12, 2004 agingga iti Disiembre 2012, ket 33 a beses nga indeklarana ti bagina a kas US citizen babaen ti positibo ken direkta a panangusarna iti American passportna imbes a ti Philippine passportna.

“Babaen dagitoy nagsaruno a pagteng, saan a nailaksid nga inarakup manen ti respondente ti  pannakipagilina kas American. Babaen ti panangusarna iti American passportna, inusarna dagiti kalintegan ken pribiliheo a maipapaay kadagiti makipagili iti Amerika. Ngarud, awanen pateg ken puersa pay ti sinapataanna nga affidavit of renunciation para iti panggep a pannakakualipana iti 2013 elections,” kinuna ti poll body.

Kinuna ti Comelec a no maipalubos ti COC ti respondente para iti 2013 elections, uray awan ti kasapulan nga affidavit of renunciation, maikontra iti napapigsa a polisia a mangilaksid kadagiti ganggannaet iti panangituray iti Pilipinas.

“Saan a mailaksid a kasapulan ti pannakipagili iti Pilipinas para iti panagiggem iti mabutosan a pampubliko nga opisina, ket awan sabali a panggep ti kualipikasion ti pannakipagili no di tapno masiguro nga awan ti ganggannaet, i.e., awan ti tao nga adda ti loyalidadna iti sabali a nasion, a mangituray kadagiti umilitayo ken iti pagiliantayo wenno iti paset ti teritoriona,” kinuna ti Comelec.

Dagiti commissioner ti 2nd Division ti Comelec a nagpirma iti desision: Commissioner Lucenito N. Tagle, Commissioner Elias R. Yusoph ken Commissioner Maria Gracia Cielo M. Padaca, ken napetsaan iti Pebrero 1, 2013.

Iti interbiona iti media, kinuna ni Abarquez a mangipila iti petision para iti rekonsiderasion iti Comelec mainaig iti daytoy a desisionna a nangkansela iti sertipiko ti kandidaturana.

Ti kuestion, makaala kadi iti paborable a desision manipud iti poll body tapno agtuloy met laeng ti kandidaturana iti sanguanan nga umasidegen ti panagpipili?

Kabayatanna, tagtagiurayen dagiti umili no ania ti sumaruno a mapasamak iti daytoy a bakal ti politika iti Cabugao.#

Comments are closed.