Footer

BANNER NEWS: Oil spill, saan a pagtaudan ti fish kill: BFAR regional director

VIGAN, Ilocos Sur -Inalay-ayan ti hepe ti buro ti panagkalapan ditoy rehion ti amak dagiti mangngalap mainaig iti epekto ti oil spill a naidaknir iti kabaybayan ditoy probinsia.

Kinuna ni Bureau of Fisheries and Aquatic Resources  (BFAR) Regional Director Nestor Domenden a saan a mapasamak ti fish kill gapu iti oil spill iti probinsia ti Ilocos Sur agsipud ta saan a napuskol ken naidarnap dagiti slick iti kabaybayan.

“… Awan ti worry nga agpatay dagiti ikan no saan a widespread ti oil spill,” kinuna ni Domenden.

Kinuna ni Domenden nga umadayo dagiti ikan iti yan ti oil spill agsipud ta “daydiay ikan, agbirok iti lugar a nadalus ti angsenna.”

Indagadag ketdi ni Domenden kadagiti mangngalap a no mapanda agkalap iti kabaybayan, adaywanda dagiti oil spill.

“Ta no akasenda ti iketda, posible a kumpet dagiti oil slug ket masabidongan dagiti nakalapanda a lames,” kinuna ni Domenden.

Segun dagiti mangngalap, no nakakaan ti ikan iti nangisit a lana, saan a kayat a gatangen dagiti kumprador agsipud ta agat-gas dagitoy.

Imballakad ni Domenden kadagiti agtagikua kadagiti fish cages a bantayanda dagitoy ket iti kanito nga adda makitada nga umar-arubayan nga slug, ikkatenda dagitoy tapno saanda a kumpet kadagiti cages a mangapektar kadagiti pupok a lames.

Kadagiti met addaan iti taraken a maritangtang, kinuna ni Domenden nga ipanda dagitoy iti naun-uneg a paset ti baybay.

Kanaig daytoy, imballakad ti BFAR regional director kadagiti agindeg iti coastal barangays ti panagtitinnulongda nga agkolekta kadagiti lana sada ikabil iti drum.

Segun iti nasao nga opisial, mabalin nga usaren dagiti nakolekta a nangisit a lana a pagispalto dagiti bumarangay.

“Pagbalinenyo daytoy a trahedia nga oportunidad,” kinuna ti nasao nga opisial.

Kabayatanna, nagtignay dagiti agtuturay iti probinsia ken munisipalidad,  maseknan nga ahensia ti gobierno kasta met dagiti coast guard tapno madalusan dagiti coastal barangays a dimmanonan ti oil spill.

Impatalged met ni Gov. Luis “Chavit” Singson iti tulong ti gobierno probinsial kadagiti coastal barangays a naapektaran iti oil spill idinto nga innayonna a kiddawenna iti nasional a gobierno iti pannakaala ti aerial survey iti kabaybayan ti probinsia tapno madetermina ti kalawa ti oil spill.

Iti Candon City, nagtitinnulong ti City Environment and Natural Resources Office ken ti Coast Guard a naggikkat kadagiti lana ken alkitran iti igid ti baybay iti sakup ti siudad.

Iti Narvacan, imbilin ni Mayor Zuriel Zaragoza ti pannakadalus ti igid ti baybay ti San Pedro ken Pantoc, dua a coastal barangays a nagdakniran dagiti nangisit a lana.

Agingga ita, di pay ammo no iti naisadsad a Myanmar vessel sadiay Bolinao, Pangasinan ti naggapuan ti oil spill.#