Footer

Polis, nadesgrasia gapu iti aso

CAOAYAN, Ilocos Sur – Maysa a polis ti naiyospital gapu ta nakadungpar iti aso sadiay Don Lorenzo Querubin ditoy nga ili itay lawasna.

Naikras ti motorsiklo ni PO3 Jennifer Adres, 31, naasawaan, ken residente iti Barangay IX, Vigan City, bayat ti panagdaliasat ti luganna idi rabii ti Pebrero 28 ket intaray dagiti nagresponde a padana a polis iti Gabriela Silang General Hospital para iti pannakaagasna.

Segun iti report, mapan koma agreport ti biktima iti dayta a rabii a nakalugan iti motorsiklona idi maysa nga aso ti kellaat a bimmallasiw iti kalsada ket nadungparna daytoy a puon ti saanna a pannakontrol ti luganna a nagtungpal iti pannakaikrasna.

Nakaro ti dadael ti motorsiklo ti biktima.

Iti pannakaisurat daytoy, awanen ti pagpeggadan ti biag ti biktima.#