Footer

SIDEBAR: Oil spill dimmanon iti kabaybayan ti Ilocos Sur

SANTIAGO, Ilocos Sur – Saan pay nga ammo ti naggapuan dagiti nangisit a lana a tumtumpaw iti kabaybayan ditoy probinsia.

Saan pay a maberipika no nagtaud ti oil spill iti naisadsad a Myanmar vessel sadiay Bolinao, Pangasinan.

Ngem idi bigat ti Pebrero 18, nadlaw da Kapitan Ruben Elefante ti Barangay Gabao,  Santiago, Ilocos Sur dagiti nayaplag a kasla aspalto iti igid ti baybay a sakup ti barangay, a dagiti dadduma ket nagtutukel a kimpet iti tangrib ken kadaratan a naipaigid babaen ti dalluyon.

Ngem saan laeng a dagiti agindeg iti Barangay Gabao ti nakakitaan kadagiti nangisit a lana. Nakita daytoy kadagiti coastal barangays ti San Esteban, Santiago, Candon City, Santa Lucia, Santa Cruz ken Tagudin, iti maikadua a distrito iti Ilocos Sur.

Naireport met iti simmarsaruno nga aldaw ti pannakakita kadagiti tumtumpaw a nangisit a kasla aspalto iti kabaybayan ti sumagmamano a coastal barangays iti umuna a distrito, kas iti Barangay Puro iti Magsingal.

“Posible a maapektaran dagiti maritangtang iti pupokanmi ken dagiti seaweeds ta dida unay makaadayo iti nasao a likido,”  kinuna ni Kapitan Elefante iti interbio kenkuana.

Maysa a mangngalap, ni Noli Etrata a taga-Barangay Gabao, ti nagpakalbo gapu ta saanna metten a maikkat ti lana a kimpet iti buokna uray kasano ti panangsabonna.

Uray dagiti bilog a kimpetan ti nangisit a lana, adu a rigat dagiti mangngalap a nangikkat kadagitoy.

Iti sanguanan daytoy a “trahedia” a kas kuna ni BFAR Regional Director Nestor Domenden, nagtitinnulong dagiti lumugar kadagiti naapektaran a coastal barangays tapno madalusan ti igid ti baybay a sakup ti lugarda.

Nangisayangkat iti panagdalus dagiti mangngalap iti Tamurong 1st, Candon City babaen ti panangikabilda dagiti nangisit a lana a kimpet iti katangriban iti sako ken drum.

“Medio narigat nga ikkaten ta agrunawda no umaldawen,”  kinuna ni Engr. Ismael Ganaban, CENRO officer ti Candon City, iti interbio kenkuana bayat ti panagdalusda iti katangriban a sakup ti Barangay Tamurong.

Inlawlawagna a masapul a maikkat dagiti nasao a nangisit a lana ta agsublida met laeng iti danum no agatab.

Nangala met iti sample ti nangisit a lana dagiti kameng ti Coast Guard bayat ti panagdalusda tapno maikumpara iti oil spill a napasamak idiay Bolinao, Pangasinan nga atapenda a nagtaudan ti nasao nga oil spill a dimmanon iti maikadua a distrito ti Ilocos Sur.

Iti interbio ti DZTP Tirad Pass, inpatalged  ni Gobernador Luis ‘Chavit’ Singson ti pannakaipaay iti tulong kadagiti naapektaran a mangngalap iti probinsia ti Ilocos Sur. (Karaman ti report ni Danny Antalan)

Comments are closed.