Footer

Tawid ti Kaputotan: Uray Digoda Laengen

Ni Errol L. Abrew

 

 

DUA lawasen a nangrugi ti klase. Maikapatkon koma a tawen iti hayskul ngem marigatanen da tatang ken nanang a mangisakad iti panagtuloyko.

Makitam met barok, arig saggaysa la a busloganen ti makalapan dita Gulpo, insungona. Kurang pay sukat ti krudo, insennaay ni tatang.

Awanen, nagadu nga Intsik dita lauden, Paquito, nagdarakkel a barkot’ pagakupda.  Awan met maaramidan ti gobierno, puro sao.  Dida met aggunay a mangbugaw la koma, tsk, tsk, tuwid na daan, ppttuu, impugtit ni Nanang.

Sanabale ta intext met ni Angkelmo a Rollie, a no kano kayatmo, umulikan Baguio ta sika pay la ti boy idiay kaseraanda, inyipus ni Nanang a madama nga ikabkabilna iti labba ti ilakona nga asin.

Ninto kanon antim a Gracia ti mangpaeskuela kenka tutal awan met anakda, innayonna.  Nakapuy met a broodcock ni angkelmo, ingngursiit ni nanang.

Oy Agapita, data man ngiwatmon, sika a bakbaketan, bayawmo ta ilanglangdetmon, ingkusilap ni Tatang.

Limakami nga agkakabsat ket siak ti inaudian.  Sa ket only living boy in New York a kunada.  Ni Manang Candida, inaunaan,  pada met lan’ tatang nga aggagaud ti asawana.

Nakiasawa a dina oras.  Anansata napankam’ idi nagsirip a babbarito idiay igid ti baybay.  Kapilitan nga impulongko ken ni Tatang iti bainko ta kunami no sinno dagiti agin-indayon iti uneg ti bilog a nakaparada, duada met gayam ken ni Manong Sito a karus-dikki ti agan-anangsab a bimmangon idin ta pinuruakanmi idat’ rebentador ta inranada ketdi metten ti nagkua iti Paskua.

Nag-Japan met ti maikadua. Isut’ nangipaw-it inggatangmi iti bilog. Ngem kunana a Yakuza kano met ti naasawana. Nabayag, awan metten damagmi. Kristo met ti pallotan ti naasawa ti maikatlo.  Kunam pay, kasla na-phobia metten ni Manang Eutropia.  Isu ita ti nabati a kadkaduan nanang nga agisursor iti ikan ken asin.

Nasinga ti panagpampanunotko idi pagtimkannak ni Tatang.

‘Nia, Cabiong, kaanoka ngarud agpa-Baguio barok?  Ta uray ibulodanka pay la kenni Pare Trops ti pagpletem, impasingkedna.

‘Ton bigaten, Tang, ta isimpak pay dagitoy gamigamko, nakunak ta diak pay nakapakada ken ni Pining.

‘NIAT’ kueem idiay Baguio? nakamirugrog ni Pining idin ta nakadalukappitkamin iti abay ti bilog iti sirok ti kabus a bulan.

Kayatko ti makalpas uray hayskul laeng, nagpinnerrengkami.  Numan pay ingkari ni anti Gracia nga agkolehioakto, diak pay met ammot’ sasawek ta  ne, diak pay met nakita.

Di isukatnakto ngaruden a? ayug-manidsidir ti diar ni Pining. Nasiputak nga ingkayangna bassit ti dalukappitna, ket ammok lattan a di nagaruat iti panty iti nawakray a dasterna.  Adda kimmulaiseg iti luppok, ngem ti agat’ bagsang nga ayamuomna ti nangteppay ti umayen a tatangarak.  Sa ket iti direksionmi ti tinurong ti puyupoy ti angin nga adda naipalais a pay-od-takki iti komunal a kasilia iti barangaymi.  Awanen, natukkol a naminpinsanen ti agtubtubo a derrepko.

Ngem uray la nakellaatak idi bigla a pinasumbangir nga inyakkub ni Pining dagiti dakulapna iti rupak ket diak naalistuan dagiti bumegbeggang a bibigna.

Uray agat’ bagsang sanabale, imbag la ngem ‘diay awanen, kunak iti unegko ket nagiskrema dagiti dilami.

(Adda tuloyna)

Comments are closed.