Footer

149 nga armas, impresenta ti PRO1 iti inspection team ti Camp Crame

CAMP BGEN OSCAR M FLORENDO –  Agdagupen ti sangagasut, uppat a pulo ket siam dagiti armas a nakumpiska ti kapolisan ditoy rehion manipud idi inyimplimentarna ti Comelec gun ban.

Impresenta ni Police Chief Supt. Ricardo C. Marquez, police regional director ditoy, dagiti nakumpiska nga armas iti bunggoy manipud ti PNP national headquarters a nangisayangkat iti post audit ken inspeksion iti Police Regional Office 1 idi Marso 6.

Manipud idi Enero 13 daytoy a tawen nakakumpiskaren dagiti polis iti rehion iti 38 nga armas babaen ti inyimplementarda a search warrants, 7 ti nakumpiska iti insayangkatda a checkpoints, 40 babaen ti police response, ken 64 dagiti naisuko.

Kinuna ni Marquez a daytoy a gapuanan ti PRO1 ket resulta ti napinget a kampaniana tapno masigurado ti naseguridad ken patas nga eleksion.

Kinuna ti regional director a sustenerenda ti kampaniada tapno mapukaw dagiti instrumento ti kinadamsak.

Nangipaay met iti komendasion ni PCSupt. Miguel C. Antonio, Jr., deputy director for operations a nakabase iti Camp Crame National Headquarters iti daytoy a nagapuanan ti PRO1 iti panangidaulo ni Marquez.#