Footer

EDITORIAL: Happy Anniversary, Tawid!

Nadanon manen ti naisangsangayan nga aldaw a dinto maumag a panangilagip iti pannakaipasngay ti ingungoten a Tawid. Saan a nakapappapati a nadanonna ti kastoy a kapaut, iti laksid iti nagpasaranna nga adu a pannubok; ngem kas itay kunadan, nasam-it ti balligi a minuli ti pannubok, a kas iti balitok a nasken a maluto nga umuna iti apuy sakbay a maimatangan ti rimatna. Dayta ti kaiyarigan ti Tawid, balitok iti agdama a panawen.

Tinawen a panangilagip dagiti natarnaw a tugot, a kaimudinganna ti nalasbang  a panangmunimuni ti naragpatna a rangpaya. Dagiti pannubok ti rason no apay nga ad-adda pay a kumired iti regget a mangtarabay ken mangiduron ti kaipapananna, ta dayta ngarud ti kaitutopan ti napudpudno a panagserbi iti komunidad,  a kas entidad ti  agirakrakurak, ken kas pagsandagan iti kinapudno.

Di mabubos a panunoten a nadanonna ti kastoy kapaut ti panagserbina, sangadosenan a tawen ti binaklayna ket gapu iti dayta, mangnamnamakami nga ad-adu pay dagiti tawen nga inna ipaay iti komunidad ni Ilokano, lalo dagiti saan unay idi a makadilamot iti mapaspasamak ken gunay iti nakaiyanakan a daga ta addada nga agnanaed iti adayo a lugar, ita nalakada laengen  a maakses ken makaagsaw babaen ti kopiana iti internet—nga agpaay iti amin nga Ilokano iti sibubukel a lubong ken dagiti isu amin mangipatpateg  iti nakaiyanakan a dila.

Ita, dayta sangadosena a tawen ket kaipapapananna ti sangadosena a balligi; tinawen a panagapit iti balligi tunggal dumteng iti panawen nga intayo pananglagip iti pannakaipasngayna. Ngem dayta a balligi, saan a kabukbukodan ti editorial staff, no di lalo pay a balligi kadakayo am-amin a tumartarabay iti softcopy ken hardcopy ti pagiwarnak; dagiti amin a subscribers, advertisers, sponsors, ken dagiti patrons. Aminkayo, dakayo ti ad-adda a nagballigi, ta no awankayo, saanna koma a nadanon ti sangadosena a tawen; ti balligi ket agpaay kadakayo amin!

Saan a magatadan ti balligi. Awan katukadna a pirak, ta namuli babaen ti panagtulid ti panawen, ket dagiti tugotna isuda ti nangbukel iti pakasaritaan, a kas lasag ken dara ti puli ni Ilokano; iti wagayway ti kabaruanan a teknolohia, saan a nagpaudi a nangitakder ti bandera; saan a nagamusay iti subsobna no di ket nakigiddan iti baddek ti panawen. Daytoy ti natarnaw a ladawan ‘toy pagiwarnaktayo.

Siraragsakkami nga agkuna, Happy 12 Years Anniversary! (JMA, Jr.)