Footer

MANNUROT: Ayandan dagiti Saksi?

Kolum ni Danny Antalan

(Umuna iti dua a paset)

 

Awan sueldoda, awan allowance, productivity pay, 13th month pay.  Awan ti awatenda.  Ngem isuda ti karigatan ti trabaho ditoy rabaw ti daga.  Daytoy ti responsibilidad wenno akem a kayat a liklikan dagiti kaadduan.  Kanayon a nakasebba ti biagda.

Isuda dagiti saksi, wenno aw-awagan ti gobierno nga state witness.

Saksi ti maysa a tao no naimatanganna ti maysa a kaso wenno adda impormasionna iti pannakaaramidna dayta ket maayaban iti korte tapno isalaysayna.

Daksanggasat ta adu kadakuada ti mapapatay.  No di man aglemlemmeng.

Ni Oliver Lozano a saksi iti NBN-ZTE deal ti nagkamang kadagiti madre ken sumangsango pay ket itan ti kaso; ni Esmail Amil Enog, saki iti kaso a Maguindanao massacre, ti na-chainsaw ti narasi a bagina, pinutedputedda a kasla kayo; dua metten a witness iti kaso ni Doc Gerry Ortega ti napapatay.

No nabaknang ken impluensiado dagiti suspek, dagitoy a pagteng ti maysa kadagiti pattapattaenen a mapasamak.  Nagbiagda ken nagturay iti kuartada ken panagimbubukod, dagitoy met laeng ti pagtarayenda tapno mailasatda dagiti bagbagida.

Ania, adda met ti witness protection program ti gobierno, kunam?  Kasus, ket puyot sa met dayta a programa.  Ta ne, agbilangtayo kadagiti kontrobersial a krimen ken pasamak nga in-inut a maib-ibusen dagiti saksi kadagitoy a kaso.

Unaentayo ti nakaam-ames nga Ampatuan Massacre a nangpapatayanda a kasla piek kadagiti 57 a tattao, agraman kadagiti nagkaadu a bilang ti media idi Nobiembre 23, 2009.  Maitudtudo a responsibilidad iti maysa a kaamesan a pasamak ti pammapatay ken pulitika iti Pilipinas dagiti agaama a da sigud nga ARMM Governor Andal Ampatuan, Sr.,  dagiti putotna a da Zaldy Ampatuan ken Andal Ampatuan, Jr., nga iti dayta a gundaway, isuda ti mangiturturay iti pakabuklan ti Maguindanao idiay Mindanao.

Agasem, innem a witnesses ken kapamiliada ti natayen.  Tallo ti saksi ken tallo kadakuada ti kabagian ti dadduma a saksi

Ni Alihol Ampatuan, maysa kadagiti witnesses ken kabagian pay met ti maitudtudo a suspek, ti pinaltoganda idiay Shariff Aguak itay napalabas a tawen.  Ni Esmail Amil Enog ti sabali pay a napapatay a saksi, naputed-puted ti pisikal a bagina babaen ti chainsaw.  Chainsaw met laeng ti ar-aramaten idi a wagas a pammapatay idiay Maguindanao tapno makaparnuay iti buteng kadagiti residente.  Ni Enog ket nagserbi kas drayber ni Ampatuan ken nagpukaw iti sumagmamano nga aldaw sakbay a nasarakan ti bangkayna a nakasako.

Ti umuna kadagiti napapatay a saksi iti kaso dagiti Ampatuan ket ni Suwaib Upham.  Ni Upham ti nagkuna nga isuna ti maysa kadagiti nangpapatay kadagiti biktima kas mandar ni Ampatuan. Karaman kadagiti natayen a nainbolbar iti daytoy a kaso ket ni PO2 Hernani Decipulo nga ibagbagada a nagpakamatay babaen ti itatapuakna.

Malaksid kadakuada, dagiti dadduma a saksi ket nabutbutengda wenno napasuksokanda iti adu a kantidad tapno laeng agsanudda iti kaso wenno pumaborda kadagiti akusado.

Iti sabali a bangir, dua metten a saksi iti kaso ni Gerry Ortega ti natay, ti environment activist ken mediaman a napapatay idiay Puerto Princesa, Palawan idi Enero 2011.  Darakkel a tao ti maitudtudo a responsable iti panakapapatay ni Ortega a pakairamanan da sigud Palawan Governor Joel Reyes ken ti kabsatna a ni Mario Reyes a mayor iti ili ti Coron.

Nasarakan ni Dennis Aranas a nakabitin laengen babaen ti strap ti shoulder bag bayat a nakabalud iti pagbaludan iti Quezon City.  Sabali pay a saksi, ni Percival Lecias, ti natay iti pagbaludan met laeng gapu iti sugatna a nag-infect kano.

(Adda tuloyna)

Comments are closed.