Footer

Misis, biniktima ti 3 babbai

SAN FERNANDO CITY – Maysa a misis ti nabalbalatong ti tallo a babbai a makisinnukat iti kuartana iti alahas dagitoy idi bigat ti Marso 7 ditoy siudad.

Nagpulong iti polis ni Rebecca Manangan, 39, residente iti Barangay Baraoas Sur, Naguilian, La Union, a bayat ti kaaddana iti maysa a pawnshop, inasitgan ti tallo a babbai ket nagpatulongda kenkuana.

Bayat ti panagpapatangna, naay-ayo dagiti suspek ti biktima a mangisukat iti P5,000.00 a kuartana iti dua a singsing dagiti suspek.

Mapapati nga inted pay ti biktima kadagiti suspek ti kuentas ken aritosna nga agbalor amin iti P7,600.00.

Kinuna ti biktima a kasla nahipnotismo ta dina napupuotan ti panangiyawatna iti kuarta ken alahasna kadagiti suspek.

Nagsawar dagiti polis ngem saandan a nabirokan pay dagiti nangloko iti biktima.#