Footer

Tawid ti Kaputotan: Uray Digoda Laengen

Ni Errol L. Abrew

 (Maudi iti dua a paset)

 

DANDANI agpangaldawen idi immaynak sinabat dagiti agassawa a nakakotse idiay estasion ti Victory.  Sanabale ta classmate met idi ni angkelmo ti prinsipal dita Baguio City High, insungo ni anti Gracia. Isunton ti kumuyog kenka ‘ton bigat ta mabalin pay met a yinroldaka, dua a lawas pay met la a nakarugit’ klase.

Ti aramidem ditoy Cabs, (pang city boy a birngasko) nakkong a ket, inaldaw nga ibellengmo dagiti orinola dagita nay babbai a Koreana. Adda met c.r.da ngem ngamin ta agdu-yosak met iti organic, dagidiay isboda ti pagsibogko kadagiti orkidia.  Isu nga idiay drammo nga ibelleng. Saan met a naangseg ta adda met laokna a danum ken Lysol, ingkalinteganna

No aggapukan iti klasem iti malem, i-vacuummo dagiti kuartoda.  Ken tsek-apem a nakaserran ti gate ta alas dies ti curfew, innayonna.

Wen anti.

Ken pangaasim ta dika agibolbolsa wenno agpidpidut tapno diak met a maibabain, wen?  No mabisinka, aglukatka lattan idiay fridge, ipabpabalaymon, wen?

Wen anti.

KABIGATANNA, sakbay a mapankam’ ken ni Angkel Rollie idiay pageskuelaak, inyam-ammonak ni anti Gracia kadagiti lima a Koreana a boardersda: Josie Nabuyoki, Sarah Lee, Christine Taeh-wo, Leslie Rhee ken ti mestisa a Puraw-Koreana a ni Jennifer Smith.  Madamada nga agsursuro iti lengguahe nga English kadagiti nadumaduma a pagadalan iti siudad, impakaammo ni anti.

Kasla agbibinnainkami pay met idi damo.  Nakunak ta no apanako n agkolekta iti orinola iti agsapaket nakaplastar metten iti ruangan.  Nakalawas a kasdiay.

Ngem saan a nagbayag, idi maisurotak met nga aginglisen, pastrekendak metten sagtunggal kuartoda.

Daytoy Jennifer ti makitak nga adda pilpiliana.  Ta no dadduma kasla iranranana ti agsukat no nakastrekakon.

Ket maysa nga aldaw, impakaw-itna ketdin ti brana kaniak. Nakapantalon met ketdin ngem nagdawadaw ti thongs a pantyna.  Nalagipko ni Pining.  Napasanapsapak ta kellaat a nagungar ti agkukurot a kawitanko.

Diak makaturogen iti dayta a rabii. Naitalimudok iti imahinasionko ti mala-diosa ti sippukelna a pammagi ti mestisa. Saan a kasla idiay Balawarte nga agat’ daing wenno agat’ bagsang ti ayamuom dagiti babbalasang a no di man nalasang ket apagukrad pay laeng naiyasawan.

Sakbay a yepyepenak, ingkarik iti bagik nga igaedko iti agadal tapno maka-girlfriend-nakto met iti kas ken ni mestisa.Wen kaka, agat’ Downy man sika ti alingasaw ti orinolana. Nagsudi ken nagdarisay ket ngatan aya ti maris makopa a perlasna, isu la ket makaw-iden ti naderrep a kapanunotak.

Agammingaw pay la ti kallid ti derrepko iti dayta nga agsapa, simmippayot ti anghel de demoniok.  Baam man, nakunak ta iggemkon ti orinola ni Jennifer.

Uray la simgar ti merretko idi maallingagko ti nabangag a boses ni anti. Kaslaak la nasukaan iti bainko a natiliwan.

Ayna! Cabiong aya, unay la ket met a dugyotmon ngay.  Apay nga insawsawmo dayta tammudom iti orinola saka dinilpatan, dika la ket ma-arieken? Apoka met. ‘Niat’tan? Ppttuu, impugtitna.

‘La rasonam, napawingiwing ni anti.

K-kasano met ngamin anti, ket daytoy a pangpanglawko ammok nga awanto a pulos ti maaremko kadakuada.

Ket ages-eskuelaka met?  Anusam pay laeng a.

Sa maysa ket daytoy a ngisngisitko, sino met koma ti mailaw-an?  (Ni la ngata Pining nga agat’ daing).

Awanto a pulos ti mangayat kaniak, insilpok, numan pay kursunadak uray siasinoman kadakuada. Saan nga agbayag, agsublidanton idiay Korea no nalaingdan nga ag-English.

Ammok met a nungka man diakto pulos matagikua dagiti bagas ken sagpawda.  Isu nga anusakon a, uray digoda laengen ti maramanak, kuntentoakon, anti.

Sipud idin, inwalinen ni anti ti orga-organic tapno di kano ag-panic.  Agsursuro ita nga agtokar iti Yamaha organ.#